دوابەدوای هەڕەشەکانی ئەم دواییەی دۆناڵد ترەمپ، لە دژی کۆماری ئیسلامی ئێران بە "بۆردومانی بێ وێنە"، وێنە نوێیەکانی مانگی دەستکرد دەریدەخەن کە پنتاگۆن لانیکەم شەش فڕۆکەی بۆمبڕێژکەری B-2 کە توانای چەکی ئەتۆمییان هەیە لە بنکەی دیێگۆ گارسیا جێگیر کردوە.

هەواڵ:KNNC

لەدوای پەرەسەندنەکان و ئاڵۆزبونی زیاتری ململنێکان، دورکەوتنەوە لە گفتوگۆکردن و هەڕەشەکردن لەسەر یەکتری، ئەمەریکا و ئێران خەریکە دەیگەیننە مریشکە ڕەشە، ترەمپ هەڕەشەی بۆمبارانکردنی بێ وێنە لە تاران دەکات، تارانیش دەڵێت؛ لە ئەگەری هەر هێرشێکدا ئەمەریکا سەلامەت نابێت.

لە نوێترین پێشهاتیشدا، ئەمەریکا بۆیەکەمجار شەش فڕۆکەی مەترسیدار لە جۆری فڕۆکەی بۆمبڕێژکەری B-2 کە هەڵگری بۆمبی ئەتۆمین و بۆ حاڵەتی مەترسیدار نەبێت بەکاری ناهێنێت، لە بنکەی دیێگۆ گارسیا  جێگیر کردوە.

ئەمەش وەک هۆشدارییەک بۆ تاران سەیر دەکرێت، کە بە بونی ئەو فڕۆکانە ئەگەری هێرشکردنە سەری زیاتر دەبێت، لە ئەگەری نەگەشتن بە ڕێککەوتن.


ئەو دورگەیەی فڕۆکەکانی لێ جێگیر کراوە، لەژێر کۆنتڕۆڵی بەریتانیادایە و بە هابەشی ئەمەریکا بەکاریدەهێنن، بنکەکە لە پێگەیەکی ستراتیژیدایە بۆ بە ئامانجگرتنی ئێران و یەمەن لەلایەن وشنتۆنەوە.

زۆر بونی فڕۆکە جەنگییەکان لە کاتێکدایە کە ئەمەریکا هێرشە ئاسمانییەکانی بۆ سەر حوسییەکان لە یەمەن چڕتر کردوەتەوە و بەڵێنی بەردەوامیش دەدات بۆ بەتەواوەتی لەناوبردنیان.

 لە چەند ڕۆژی ڕابردودا، کاربەدەستانی کۆماری ئیسلامی هۆشدارییان لە ئەگەری هێرشکردنە سەر دامەزراوە ئەتۆمیی و سەربازییەکانی ئەو وڵاتە داوە، رایانگەیاندوە لە  ئەگەری هەر هێرشێکدا بۆسەر وڵاتەکەیان، بنکەی دیێگۆ گارسیا سەلامەت نابێت و  دەیکەنە ئامانج.

پنتاگۆن ڕۆژی سێشەممە ڕایگەیاند کە بە خێرایی شوێنپێی خۆی لە ڕۆژهەڵاتی ناوەڕاست فراوانتر دەکات بە ناردنی کەشتیی( USS Carl Vinson ) کەشتییەکی فڕۆکە هەڵگرە و ئەمەش ئاماژەیەک بۆ هۆشداریدان بە تاران لە ئەگەری نەگيستنە ڕێکەوتن لەسەر  بەرنامە ئەتۆمییەکانی.

ترەمپ ڕۆژی یەکشەممە هەڕەشەی قورسی لە تاران کرد کە بۆردومان دەکرێن بە جۆڕێک پێشوتر هاوشێوەی نەبوە، ئەگەر ئێران بەردەوام بێت لە پشتیوانیکردنی یاخیبوانی حوسییەکان لە یەمەن و ڕەتی بکاتەوە پڕۆسەی بەرنامە ئەتۆمییەکەی کۆتایی پێبهێنێت.