بۆ چارەسەركردنی كێشەی كەمی كارەبا، لیژنەی نەوت و گازی ئەنجومەنی نوێنەرانی عێراق داوا دەكات پاتری وزەی خۆر بەشێوەی خۆڕایی بەسەر هاوڵاتیاندا دابەش بكرێت.


هەواڵ: (KNNC)

باسم نەغەمیش غەریباوی، ئەندامی لیژنەی نەوت و گازی ئەنجومەنی نوێنەرانی عێراق بەمیدیا عێراقییەكانی راگەیاندوە: بۆ چارەسەری كێشەی كەمی كارەبا لە ئێستادا بەهۆی قەیرانی كەمی هاوردەكردنی غاز لەئێران بۆ وێستگەكانی بەرهەمهێنانی كارەبا،  دەكرێت بیرۆکەی پشتبەستن بە وزەی خۆر وەك بەدیلێك بەكاربهێنرێت.

وتیشی: ژمارەیەك لە کۆمپانیا تایبەتەکان پلێتی خۆر و پاتری، لە كارگەكانی بەرهەمهێنەرە خراپەکان پلێتی و پاترییەكانینان هاوردە کردوە، ئەمەش وایکردوە هاوڵاتیان بڕوایان بە بەدەستهێنانی كارەبا لە وزەی خۆرەوە نەبێت و بەشکستخواردوی لەقەڵەم بدەن.

رونیكردەوە كە؛ هاوردەکردنی پلێت و پاتری وزەی خۆر لەلایەن وەزارەتی پیشەسازی و بەرهەمهێنەرانی نێودەوڵەتییەوە دەبێتە هۆی بەرزکردنەوەی متمانەی هاوڵاتیان لەم تاقیکردنەوەیە.

ئەندامەكەی لیژنەی نەوت و گازی ئەنجومەنی نوێنەرانی عێراق ئاماژەی بۆ ئەوەشكردوە، بەمەبەستی دەربازبونیش لە كەمی كێشەی كارەبا، حکومەت دەتوانێت پاتری بێ بەرامبەر بەسەر هاوڵاتیاندا دابەش بکات، هەروەها پانێڵی خۆر لەڕێگەی قەرز و پێشینەکانەوە بۆ هاوڵاتیان دابین بكات.