مەزڵوم عەبدی رایگەیاند، لەدوای رێکەوتنیان لەگەڵ ئەحمەد شەرع، تورکیا مەرجە قورسەکانی لەسەر ئیدارەکەیان هەڵگرتوە.

هەواڵ:KNNC

مەزڵوم عەبدی، فەرماندەی گشتی هێزەکانی سوریای دیموکرات (هەسەدە) بەپێگەی ئەلمۆنیتۆری راگەیاندوە، تورکیا لە بەیاننامەیەکی فەرمیدا دەستیکردوە بە بەکارهێنانی زمانێکی میانڕەو، سەرنجیشمانداوە بیرۆکەی یەکخستنی هێزەکانی سوریای دیموکرات و دامەرزاوە ئیدارییەکانی لە دەوڵەتی سوریا قبوڵە.

وتیشی: کەشی کاتی رێککەوتنەکە لەگەڵ ئەحمەد شەرع دۆستانە و ئارام بوە و بەرێزەوە پێشوازییان لێکراوە، ئەوەش راست نییە کە دەوترێت لایەنی ئەمەریکی دەستوەردانیان لە رێکەوتنەکە کردبێت، بەڵکو تەنها رۆڵی ئاسانکارییان گێڕاوە بۆ گواستنەوەیان بۆ دیمەشق.

عەبدی دەڵێت: "ئیدارەی نوێ لەدیمەشق دژایەتی زمانی کوردی ناکات، بەڵام نەخراوەتە ناو دەستوری کاتیەوە و ئەمەش نائومێدکەر بوو بۆمان".

فەرماندەی گشتی هێزەکانی سوریای دیموکرات باسی لەوەشکردوە، چڕکردنەوەی دەسەڵاتی ئیدارەی بە تەنها لە دیمەشق هێڵی سوری ئەوانە و دەیانەوێت ناسنامەی هێزەکانی سوریای دیموکرات لەناو ریزەکانی سوپای نیشتیمانی سوریا بپارێزن کە خەریکە پێکیدەهێنن.

دەشڵێت: ئەحمەد شەرع داوای لێکردوین دەستبەرداری کۆنتڕۆڵکردنی ناوچە زۆرینە عەرەبییەکان بین وەک دێرەزۆر و ڕەقە، بەڵام ئەمە هێشتا ئەولەوییەتیان نیە، دۆخی ئەو ناوچانەش زیاتر تاوتوێ دەکەین.