لەکوردستاندا چەمک وکایەی  سیاسەت و کۆی پڕنسیپ و بەها نیشتیمانییەکان  بەشکۆی پێشمەرگەوە  بەدەستی ئەنقەستی پارتی و یەکێتی  شکێنراون و سوک وبێبایەخکراون، تەواوی ئەو ڕێگایانەی جێگەی هیوابەخش بوون  بۆدەستەبەری لانی کەمی ژیانێکی شکۆمەندانە بۆ تاکی کورد وێرانکراون، ئەو دوو گرووپە فرعەونئاسا شتێک نەماوە  ئەتکیان نەکردبێت. سیاسیەت، دیموکراسی و هەڵبژاردن، حزبایەتی . ئابووری، پەروەردە وخوێندنی باڵا، تەندروستی و ژینگە. ویاسا..هتد هەڵبەت ئەمەش بەرمەبنای ئەوەیە دوولایەنی نابەرپرسیار  بەغەدر ودوور لەهەمو بەها ومۆڕاڵێکی سیاسی و بێ پشتیوانی ڕەوای میللەت خۆیان بەسەر دەسەڵات وکوردستاندا سەپاندووە ، بەشێوەیەکی ئێجگار مەترسیدار بڕسکییان لە خەڵکی هەناسەی سارد و  خێر لەخۆنەدیوی ئەم هەرێمە بڕیوە. ئێستا شتێک نەماوە بەناوی پەیوەندی نێوان  خەڵک و دەسەڵات .

  دیارە بەداخەوە، سەرباری  ئەو هەمو کارەسات و نەهامەتییە گەورەییە بەسەر نیشتیمانی وپێشمەرگە و خەڵکدا هێناویانە، کەچی هێشتا  پەندییان لەئەزمونی تاڵ وپڕ لەشکستخواردووییان وەرنەگرتووە و تەمێ نەبوون.. بەردەوام  بێگوێدانە  پڕنسیپە نیشیمانی وبەها مرۆییەکان چاوچنۆکی و حەزی دەسەڵاتخوازانەیان وایکردووە دوور لەهەمو پێوەرەکی سیاسی وڕەوایەتیی وعەقڵمەندانە  درێژە بە سیاسەتی بێ سەروبەرییانە بدەن و دۆزی کورد وچارەنوسی کوردستانیان بەرەو تونێلکی تاریک و بێ ئاسۆ بردووە،   ڕێگەی هات ونەهات گرتۆتەبەر ، لەسەر هەمان ڕێچکەی چەوت وپاوانخوازانەیان بەردەوامن و  بەدیدکی  مێگەلئاساوە دەڕوانە کۆمەڵگە هێزە سیاسیەکانی کوردستان.

هەنوکە   جیهان و وناوچەکە وعێراق وهەرێمی کوردستان پێدەنێتە قۆناغێکی نوێی سیاسیەوە و بەهەلومەرجێکی هەستیاری و پڕ لەگۆڕانکاری تەماوییدا گوزەر دەکات، گرنگە هەم خەڵک وهەم هێزە دیارەکانی دەرەوەی پارتی ویەکێتی زۆر سیاسیانە و عەقڵمەندانە ولۆژیکیانە لەچوارچێوەی بەرەیەکی فراوانی نشتیمانیدا ڕووبەڕووی تەحدییەکان ببنەوە، چونکە هەمولایەک لەوە دڵنیابوون  جووت گرووپ خاڵین لەهەمو هەستی بەرپرسیارییەتی نیشتیمانی.

ئەوپەڕی گەمژییە بڕوا بەوە بهێنرێت پارتی و یەکێتی وەک دوولایەنی سیاسی وخاوەن ئەجندای نیشتیمانی بن لە خەمی گشتیدا مابن . یاخود  هیچ جۆرە ئومێدێکیان  لەسەر هەڵبچنیت.

گرنگترین هەنگاو  بۆجێگرەوەی ئەو دووهێزە فاشلە، ئەرکی بنەڕەتی وسەرەکی بزووتنەوەی گۆڕان، کۆمەڵ ئیسلامی ، یەکگرتوی ئیسلامی، هاوپەیمانی بۆ دیموکراسی ودادپەروەری ، حزبی شوعی، بزووتنەوەی ئیسلامی. بەرەیەکی فراوانی تۆکمەی خاوەن نەخشەیەکی هەمەلایەن بەپێوەری سیاسیەتێکی نیشتیمانییانە لەسۆنگەی خوێندنەوەی هەڵسەنگاندنی تیۆری  ڕیالیستانە ڕووبەڕووی ئەو دۆخە مەترسیدار وئاڵۆزکاوی و پڕ لەنائومیدییە ببنەوە،   چونکە هەم ڕەوتی ڕووداوە نوێیەکان و هەم ڕەوڕەوی مێژوو ڕەحم بەهیچ کەس و لایەنێک ناکات. بۆیە تکایە واز لەپارتی ویەکێتی بێهنن ، ئێوە چیتان پێدەکرێت...؟