بەئامانجی بەدەستهێنانی داهاتی بەرز، ژمارەیەكی زۆری بەكارهێنەرانی تۆڕە كۆمەڵایەتییەكان ئاواتەخوازن بەناوبانگ ببن، رۆژنامەیەكی ئەمەریكی ئاشكرایكردوە كە زۆربەی بلۆگەرەكان نازانن کە بەدەستهێنانی ئەو داهاتە "دڵنیایی نییە".

هەواڵ: (KNNC)


لەراپۆرتێكدا رۆژنامەی (The Wall Street) لەسەر زاری ژمارەیەك شارەزای تۆڕەكۆمەڵایەتییەكان بڵاویكردوەتەوە، دروستكردنی بابەتێك و بڵاوكردنەوەی لە پلاتفۆڕمەكانی تۆڕە كۆمەڵایەتییەكان بەمەبەستی بەدەستهێنانی داهاتێکی بەرز  کارێکی ئاسان نییە،  زۆرێک لە ئەو كەسانەی لەم بوارەدا کاردەکەن، دوای لەناوچونی سەروەت و سامانەكەیان ئاواتەخوازن تەنها خەرجییەکانی بەرهەمهێنان بەدەستبهێننەوە.

پێشتر کۆمپانیای گۆڵدمان ساکس، ئامارێكی بڵاوكردبویەوە كە لە کۆی سەدان ملیۆن کەس کە كار لەسەر دروستکردنی ناوەڕۆکی دیجیتاڵی لە سەرانسەری جیهاندا دەكەن و چالاكی بوارەكەن، نزیکەی (50) ملیۆنیان داهاتێکی دیاریكراو بەدەستدەهێنن.

رونیشیكردبویەوە، ژمارەی ئەو کەسانەی لە رێگەی دروستکردنی ناوەڕۆکی دیجیتاڵییەوە پارە بەدەستدەهێنن، پێدەچێت بەڕێژەیەکی ساڵانە لە نێوان (10% بۆ 20%) تا ساڵی (2028) گەشە بکات، بەمەش ژمارەی چالاکوانانی بۆ دو هێندە بەرزدەبێتەوە و چانسی بەدەستهێنانی پاداشتێک کەم دەبێتەوە.

بەبڕوای پسپۆڕانی پلاتفۆڕمەكان، بۆ بەدەستهێنانی داهاتی تۆڕە كۆمەڵایەتییەكان رەنگە چەند مانگێک یان ساڵانێک بخایەنێت، هەروەك ئاماژەشیان بۆ ئەوەكردوە؛ ویستی بینەر و وەرگر بۆ بەرهەمهێنانی بابەتەكان و زیادبونی ژمارەی فۆڵۆ بەواتای گەڕانەوەی پاداشت و بەدەستهێنانی داهات نایەت.