بەڕێوەبەرایەتى بەرەنگاربونەوەى توندوتیژی دژی ئافرەتان و خێزان لە سلێمانی، لیژنەیەکی بۆ پاراستنی ژنە کاندیدەکانی هەڵبژاردنی خولی شەشەمی پەرلەمانی کوردستان پێکهێناوە و وتەبێژى بەڕێوەبەرایەتییەکەش دەڵێت: دۆخی خانمان لە ڕۆژانی بانگەشەدا بە باشی دەبینن.

هەواڵ:KNNC

ڕائید ڕاز فریا، وتەبێژی بەڕێوەبەرێتی بەرەنگاربونەوەى توندوتیژی دژی ئافرەتان و خێزان ژنان لە سلێمانی بە کەی ئێن ئێن-ی وت: لیژنەکە بۆ ماوەی بانگەشەی هەڵبژاردن، پێکهێنراوە و دەستەی باڵای خانمان و کۆمسیۆنی باڵای هەڵبژاردنەکان و بەڕێوەبەرایەتی بەرەنگاربونەوەی توندوتیژیی دژی ژنان و ئەنجومەنی ئاسایش و داواکاری گشتیی و دەستەی سەربەخۆی مافەکانی مرۆڤ و نەتەوە یەکگرتوەکان و چەندین ڕێکخراوی ناوخۆی و بیانی تێیدا بەشدارن.

وتیشی: تائێستا دۆخی خانمان لە بانگەشەدا بەباشی دەبینن و هیچ کاندیدێکیش سکاڵای تۆمار نەکردوە. 

دەشڵێت، هێڵی گەرمی 119 یان کارا کردوە کە خانمان دەتوانن لەکاتی روبەڕوبونەوەی هەرجۆرە پێشێلکارییەک بەرامبەریان پەیوەندیی بە لیژنەکەیانەوە بکەن.