شەوى رابردو، بەهۆى ئەوەى توشى حاڵەتى رشانەوە و بورانەوە بوە، منداڵێکى تەمەن 10 ساڵان رەوانەى نەخۆشخانەى کەرکوک کراوە، بەڵام دواى پشکنین دەرکەوتوە ئەم منداڵە بە سەختى ئەشکەنجە دراوە و بەهۆشیەوە دوو مامى دەستگیر کراون.

هەواڵ:KNNC

پەیامنێرى کەى ئێن ئێن لەبارەى ئەم روداوەوە رایگەیاند؛ نزیک کاتژمێر 9:00ـى شەوى رابردو، منداڵێکى بە رەگەز عەرەب کە دانیشتوى گەڕەکى کۆبانێیە رەوانەى نەخۆشخانەى کەرکوک کراوە و حاڵەتەکەى بونى رشانەوە و بورانەوە بوە و لەگەڵیشیدا حاڵەتەکەى خراپتر بوە و زیاتر لە جارێک دڵى لە لێدان کەوتوە و بە ئامێر؛ لێدانى دڵى بۆ گەڕێنراوەتەوە، بەڵام دوانیوەڕۆى ئەمڕۆ بەهۆى سەختى برینەکەیەوە گیانى لەدەستدا.

ئاماژەى بۆ ئەوەکرد کە دواى پشکنینى پزیشکى دەرکەوتوە کە ئەم منداڵە ئەشکەنجە دراوە و بە دار و ئاسن لێی دراوە، بۆیە هەر شەوى رابردو لەلایەن پۆلیسى نەخۆشخانەکەوە مامێکى منداڵەکە دەستگیر کراوە و بەیانى ئەمڕۆش مامێکى دیکەى دەستگیر کراوە.

پەیامنێرى کەى ئێن ئێن ئەوەشى خستەڕو کە دایک و باوکى ئەم منداڵە جیابونەتەوە و باوکیشى سزاى زیندانیی هەتا هەتایی بەسەردا سەپێنراوە، لەگەڵ مام و ئامۆژنى ژیاوە و گومانیش دەکرێت هەر ئەوان ئەشکەنجەیان دابێت و بوبێتنەهۆى گیانلەدەستدانى.

کەرکوک/ دلۆڤان مەجید