سەرۆكی فراكسیۆنی بزوتنەوەی گۆڕان رایدەگەینێت؛ ئەركی وەزارەتی تەندروستییە كە داوودەرمان و كەلوپەلی پزیشكی پێویست بۆ چارەسەرکردن دابین بکات، دەشڵێت: راکێشانی دەستی کەرتی تایبەت بۆ ناو هەناوی وەزارەتەکان بارگرانی بۆسەرشانی خەڵک و دەوڵەمەندکردنی کۆمپانیاکان، ئەوەندەی دیکە متمانە بە کەرتی تەندروستی ئەم وڵاتە ناهێڵێتەوە، هەروەك ئاشكراشیدەكات كە لەدژی گرێبەستەکەی وەزارەتی تەندروستی، سەرجەم رێکارە دەستوری و یاساییەکان دەگرنە بەر.


هەواڵ: (KNNC)


جوانڕۆ محەمەد، سەرۆكی فراكسیۆنی بزوتنەوەی گۆڕان لە پەرلەمانی كوردستان رایگەیاند: بەپێی یاسای ژمارە (15)ـی ساڵی (2007)ـی وەزارەتی تەندروستی، مادەی هەشتەم؛ ئامانج و ئەركی وەزارەتە كە داو و دەرمان و كەلوپەلی پزیشكی هەمەجۆری پێویست بۆ پێشكەشكردنی خزمەتگوزاری پزیشکی و خۆپاراستن و چارەسەرکردن دابین بکات و پێشکەش بکات.


پەرلەمانتارەكەی بزوتنەوەی گۆڕان رونیكردوەتەوە، بەپێی هەمان ماددە؛ سەرپەرشتیکردنی عیادە میلییەکان و دابینکردنی ئامێرە پزیشکییەکان ئەرکی وەزارەتی تەندروستییە و ئیجبارکراوە بۆ ئەم بابەتە، بۆیە؛ پشتبەست بە دەستوری عێراق دابینكردنی خزمەتگوزاری تەندروستی پێویستە خۆڕای یان ڕەمزیبێت.


سەرۆكی فراكسیۆنی بزوتنەوەی گۆڕان لە پەرلەمانی كوردستان ئاماژە بۆ ئەوەدەكات، راکێشانی دەستی کەرتی تایبەت و کۆمپانیا بۆ ناو هەناوی زۆرینەی وەزارەتەکان بەگشتی و بەتایبەت وەزارەتێکی پەیوەست بەژیانی هاوڵاتی (وەزارەتی تەندروستی) وێڕای بارگرانی بۆسەرشانی خەڵک و دەوڵەمەندکردنی کۆمپانیاکان، ئەوەندەی دیکە متمانە بە کەرتی تەندروستی ئەم وڵاتە ناهێڵێتەوە.


جوانڕۆ محەمەد ئەندامی پەرلەمانی كوردستان راشیگەیاندوە: لەپێناو سەروەربونی یاسا و لەدژی گرێبەستەکەی وەزارەتی تەندروستی، سەرجەم رێکارە دەستوری و یاساییەکان دەگرنە بەر.