ناوەندەکانی توێژینەوەی نەمسا لە ئەوەی خستوەتەڕو، لەچوارچێوەی پاراستنی ژینگەی وڵات، سەرچاوەی وزەی نوێبوەوە لە (80%)ـی کارەبا دابین دەکەن، ئەمەش بوەتە هۆی دابەزینی رێژەی دەردانی دوەم ئۆکسیدی کاربۆن.

هەواڵ: (KNNC)

سەنتەری ڤیگنەر (WEGC) بۆ کەشوهەوا و گۆڕانی جیهانی لە زانکۆی نەمسا رایگەیاند: بەپێی راپۆرتی (WAM) لەساڵی رابردودا  نەمسا سەرکەوتو بوە لە کەمکردنەوەی  رێژەی دەردانی گازە گەرمەكان بەڕێژەی نزیکەی (6.9%) کە یەکسانە بە (67.6) تۆن دوەم ئۆکسیدی کاربۆن.

لیۆنۆرا گێڤسلێر، وەزیری پاراستنی کەشوهەوای نەمسا، رایگەیاند: لە پێناو پاراستنی ژینگەی وڵات و بەئامانجی كەمكردنەوەی دەردانی گازە گەرمەكان و دوەم ئۆكسیدی كاربۆن و نەمسا پلانی تایبەتی خۆی هەیە و لەسەر ڕێگا ڕاستەكەیە بۆ گەیشتن بە ئامانجە درێژخایەنەکانی پاراستنی ژینگەی وڵاتەكەی.

وەزیری پاراستنی کەشوهەوای نەمسا ئاماژەی بۆ ئەوەشكردوە، بەپێی ئەو پلانەی كە وڵاتەكەی پابەندە بەجێبەجێكردنیەوە کەمکردنەوە و دەردانی گازە گەرم و زیانبەخشەكانە بە رێژەی لە (46% تا 48%) تا ساڵی (2030) هەروەها زیادکردنی بەرهەمهێنانی وزە نوێبوەوەكانە كە ئێستا توانیویەتی (80%)ـی كۆی وزەی وڵاتی دابینكردوە.

بۆ كەمكردنەوەی دەردانی گازە گەرمەكان و دوەم ئۆكسیدی كاربۆن، نەمسا رێوشوێنی نوێ دەگرێبەر كە گرنگترینیان كۆكردنەوەی  گازە زیانبەخشەکان لە ژێر زەویدا، هەروەها زیاتر فراوانکردنی تەکنەلۆژیای وزەی نوێبوەوەكان، نۆژەنکردنەوەی تەلار و باڵەخانە  کۆنەکان و دانانی سیستەمی گەرمکەرەوەی مۆدێرن لەگەڵ کەمکردنەوەی دەردانی دوەم ئۆکسیدی کاربۆن کە لە ئەنجامی کەرتی گواستنەوە.