وەزارەتی دارایی هەرێم دەڵێت: هەر فەرمانبەر و موچەخۆرێک تا (20/11/2024) کۆدی بایۆمەتریی نەبێت، موچەکەی رادەگیرێت و خۆی بەرپرسیار دەبێت.

هەواڵ:KNNC

بەڕێوەبەرایەتی گشتی ژمێرکاری لە وەزارەتی دارایی و ئابوری هەرێم بڵاویکردوەتەوە، لەسەر بنەمای ئەو رێککەوتن و لێکتێگەیشتنانەی لەنێوان وەزارەتی دارایی و ئابوری هەرێم و فیدراڵ لەسەر بابەتی چارەسەرکردنی کێشە هونەرییەکانی لیستی موچەی فەرمانبەران هاتوەتە ئاراوە پێویستە، هەمو ئەو فەرمانبەر و موچەخۆر و خانەنشینان و خاوەنپێداویستییە تایبەت و وارسی شەهیدانەی تا ئێستا (یو پی ئێن)ـیان نییە و خۆیان لە سیستیمی بایۆمەتری تۆمار نەکراوە، پێویستە تا (20/11/2024) خۆیان تۆماربکەن.

ئاماژەی بەوەشکردوە، بڕیاری خۆتۆمارکردن لە سیستەمی بایۆمەتی هەمو ئەو فەرمانبەر و موچەخۆرانە دەگرێتە کە بەهۆکاری جیاواز لەدەرەوەی وڵاتن یان مۆڵەتی بێ موچە و خوێندنیان هەیە.

هۆشداریش دەدات، هەر کەسێک موچەخۆری حکومەتی هەرێم بێت و تا بەرواری (20/11/2024 ) کۆدی بایۆمەتری نەبێت، لەلایەن وەزارەتی دارایی حکومەتی فیدراڵەوە موچەکەی ڕادەگیرێت و خۆی بەرپرسیار دەبێت.