راوێژکارێکی خامنەیی رایگەیاند: ئێران توانای تەواو و پێویستی هەیە بۆ دروستکردنی چەکی ئەتۆم و دەشڵێت: لەکاتێکی گونجاودا، وەڵامی هێرشەکەی ئیسرائیل دەدەنەوە.


هەواڵ:KNNC

کەمال خەرازی، راوێژکاری عەلی خامنەیی رێبەری باڵای ئێران رایگەیاند: ئێران توانای تەواو و پێویستی هەیە بۆ دروستکردنی چەکی ئەتۆمی، بەڵام لەسەر فەرمانی خامنەیی دروستکردنی ئەو چەکە قەدەغە کراوە.

ئاماژەی بەوەش کرد: ئێران لە ئەگەری دروستبونی مەترسی لەسەر مانەوەی قەوارەکەی، ستراتیژ و سیاسەتی ئەتۆمییەکەی دەگۆڕێت.

کەمال خەرازی باسی لەوەش کرد: ئێران توانایەکی بەهێزی موشەکی هەیە و لە ئێستاشدا کار بۆ ئەوە دەکات کە مەودای موشەکەکانیان زیاتر بکەن.

راوێژکارەکەی عەلی خامنەیی، جەختى کردوەتەوە لەوەى، لە کات و ساتی گونجاودا تۆڵەی خۆیان لە بەرامبەر دەستدرێژییەکانی ئیسرائیل بۆ سەر خاکەکەیان دەکەنەوە.