گروپە چەکدارەکانى عێراق ئەنجامدانى سێ هێرشیان بۆسەر ئیسرائیل بە فڕۆکەى بێ فڕۆکەوان راگەیاند؛ بێ ئەوەى شوێنە بەئامانجگیراوەکان ئاشکرا بکەن.

هەواڵ:KNNC

گروپە چەکدارەکانى عێراق رایانگەیاند کە بەرەبەیانى ئەمڕۆ ئامانجێکى گرنگیان لە باکورى ئیسرائیل و دواتر دوو ئامانجى دیکەیان پێکاوە، بێ ئەوەى شوێنەکانیان دیاریبکرێت.

لاى خۆیەوە سوپاى ئیسرائیل رایگەیاند؛ بەیانى ئەمڕۆ پێنجشەممە هێزى ئاسمانیی رێگریی لە دوو فڕۆکەى بێ فڕۆکەوان کردوە کە لە رۆژهەڵاتەوە بەسەر ئاسمانى سوریادا هەڵدرابون و پێشتریش رایانگەیاندبو کە سیستمى ئاگادارکردنەوەیان کارا کراوە دواى ئەوەى فڕۆکەى بێ فڕۆکەوان ناوچەى ئیلاتى تێپەڕاندوە.

هێرشى گروپە چەکدارەکانى عێراق بەردەوامییان هەیە، ئەم هێرشانە وەک پشتیوانییەک لە حیزبوڵا و حەمماس ئەنجام دەدەن دژى ئیسرائیل، سەبارەت بە هێرشەکەى بەیانى ئەمڕۆشیان تا ئێستا ئیسرائیل بە فەرمیی باسى لە هیچ زیانێک نەکردوە.