وەزارەتی خوێندنى باڵا بڕیاریدا بەدواخستنی وەرگرتنی پارەی خوێندنی پاراڵێڵ و ئێواران لە خوێندکاران و قوتابیان لە سەرجەم قۆناغەکانی خوێندنی بەرایی و خوێندنی باڵا.


هەواڵ: (KNNC)


لەنوسراوێكدا كەلەلایەن وەزارەتی خوێندنى باڵا و توێژینەوەى زانستى دەرچوە و ئاڕاستەى سەرجەم زانکۆ حکومییەکانى هەرێمى کوردستان کراوە تیایدا هاتوە؛ بە لەبەرچاوگرتنی بەرژەوەندی گشتی و دۆخی دارایی قوتابیان - خوێندکاران و داهاتی کەسوکار و خێزانەکانیان و دواکەوتنی موچەی موچەخۆران و شایستە داراییەکانیان، بڕیارماندا كە وەرگرتنی قیستى پارەی خوێندنی پاراڵێڵ و ئێواران دوابخرێت.


ئەوەیخستوەتەڕو، دواخستنی وەرگرتنی پارەی خویندنی پاراڵێڵ و ئێواران لە خوێندکاران و قوتابیانى سەرجەم قۆناغەکانی خوێندنی بەرایی و خوێندنی باڵا کە بە پارالێل یاخود ئێواران لە زانکۆکان و دامودەزگاکانی سەر بە وەزارەت دەخوێنن.


لەنوسراوەكەدا ئاماژە بۆ ئەوەكراوە، پێویستە وەرگرتنی قیستەکان بخرێتە مانگەکانی داهاتوی ساڵی ئایندە، بەپێی خشتەیەکی رێکخراو کە رەچاوی بارودۆخی داهات و دارایی هاوڵاتیانی هەرێمی کوردستان بکات.