رۆژنامەی وۆڵ ستریت جۆڕناڵ، ئاشکراى دەکات تورکیا و چەکدارە هاوپەیمانەکانی هێزێکی زۆریان بە درێژایی سنورەکانی سوریا کۆکردوەتەوە و بەرپرسێکی رۆژئاوای کوردستان لە نامەیەکدا داوا لە دۆناڵد ترەمپ دەکات، گوشار بخاتە سەر تورکیا بۆ راگرتنی ئۆپەراسیۆنەکانی لە دژیان.

هەواڵ:KNNC

رۆژنامەی وۆڵ ستریت جۆرناڵ، لەزاری گەورە بەرپرسانی ئەمەریکا بڵاویکردەوە، تورکیا و چەکدارەکانی هاوپەیمانی، هێزێکی زۆریان بە درێژایی سنورەکانی سوریا کۆکردوەتەوە و ئامادەکاریی ئۆپەڕاسیۆنی سەربازی دەکەن. 

ئاماژە بەوەشدەکات، تورکیا بە نیازە لە ماوەیەکی کورتدا ئەو ئۆپەراسیۆنە ئەنجام بدات و پانتاییەکی فراوانى ژێر کۆنتڕۆڵی هێزەکانی سوریای دیموکرات(هەسەدە) لە سوریا داگیر بکات. 

لەلایەکی دیکەوە، ئیلهام ئەحمەد، هاوسەرۆکی فەرمانگەی دەرەوەی ئیدارەی خۆبەڕێوەبەری باکور و رۆژهەڵاتی سوریا، پەیامێکى بۆ دۆناڵد ترەمپ، سەرۆکى هەڵبژێردراوى ئەمەریکا ناردوە و داواى لێکردوە، گوشار بخاتە سەر تورکیا بۆ راوەستاندنی ئۆپەراسیۆنەکانی لە دژی هەرێمەکەیان.