روانگەى سوریی بۆ مافەکانى مرۆڤ ئامارى ژمارەى کوژراوانى گروپە چەکدارەکانى هاوپەیمانى تورکیا و شەهیدانى ریزەکانى هێزەکانى سوریاى دیموکراتى بڵاوکردەوە و دەڵێت: شەڕ لە مەنبج بەردەوامە.

هەواڵ:KNNC

روانگەکە لە بەیاننامەیەکدا بڵاویکردوەتەوە؛ لەماوەى دوو رۆژى رابردودا تا بەیانیی ئەمڕۆ لە روبەڕوبونەوەکانى رۆژئاواى کوردستان 16 شەڕڤانى هێزەکانى سوریاى دیموکرات شەهید بون و 85 چەکدارى گروپەکانى هاوپەیمانى تورکیاش کوژراون.

ئاماژە بۆ ئەوەشکراوە کە سەرباریی راگەیاندنى ئاگربەست لەنێوان هێزەکانى سوریاى دیموکرات و هاوپەیمانانى تورکیا، بەڵام گرژییەکان لە مەنبج تا ئێستاش بەردەوامییان هەیە.

لەگەڵ هێرشەکانى دەستەى تەحریر شام لە 27ـى نۆڤەمبەرى ساڵى رابردو لە سوریا و دواتر روخانى رژێمى بەشار ئەسەد، گروپە چەکدارەکانى هاوپەیمانى تورکیا هێرشیان بۆسەر ناوچەکانى رۆژئاواى کوردستان دەستپێکردوەو ئیدارەى خۆبەڕێوەبەریش ئەمڕۆ لە بەیاننامەیەکدا بۆ رایگشتى ئاشکرایکرد کە هێرشى هاوپەیمانانى تورکیا بۆسەر ژێرخان و ناوچەکانى رۆژئاواى کوردستان بەردەوامن.