وتەبێژی دەمپارتی رایگەیاند: دەبێت سەرجەم لایەنە سیاسییەکان بەشداریبکەن لە پڕۆسەی ئاشتی و دەشڵێت: تا ئێستا وەڵامی لایەنە سیاسییەکان بۆ پەیامەکەی ئۆجەلان ئەرێنییە.


هەواڵ:KNNC

پاش سەردانی شاندی دەمپارتی بۆلای بەشێك لە لایەنە سیاسییەکان، ئایشەگوڵ دۆغان – وتەبێژی دەمپارتی رایگەیاند: دەبێت سەرجەم لایەنە سیاسییەکان بەشداریی بکەن لە پڕۆسەی ئاشتی، چونکە دەبێت هەموان لەم قۆناغەدا هەوڵی بەدیهێنانی پڕۆسەکە بدەن.

باسی لەوەشکرد: ئەگەر پڕۆسەی ئاشتی لە تورکیا سەرنەگرێت؛ هەمو وڵات زیانی بەردەکەوێت، هەربۆیە پێویستە پرسی کورد بە شێوەیەکی ئاشتییانە چارەسەر بکرێت.

ئاماژەی بەوەشکرد: عەبدوڵا ئۆجەلان سورە لەسەر چارەسەرکردنی دۆخەکە بە شێوەیەکی ئاشتییانە، دەشڵێت: تا ئێستا وەڵامی لایەنە سیاسییەکان بۆ پەیامەکەی ئۆجەلان ئەرێنییە.

جەختیشیکردوە لەوەی دەبێت ئۆجەلان بەشداربێت لە پڕۆسەی ئاشتی و گۆشەگیری سەر ئۆجەلان و زیندانیکراوانی ئیمڕالی هەڵبگیرێت.

لە بەشێکى دیکەى قسەکانیدا وتەبێژى دەمپارتى لەبارەى زمانى کوردییەوە وتى: بابەتی زمانی کوردی کێشەی بنەڕەییە لە تورکیا، هەربۆیە دەبێت هەمو گەلان بە زمانی خۆیان قسە بکەن لەوڵاتەکە.