سەرۆکى حکومەتى هەرێمى کوردستان بە سەردانێکى فەرمیی چوە تورکیا، لەبارەى ناوەڕۆکى کۆبونەوەکانیشى لەگەڵ بەرپرسانى ئەو وڵاتە دەڵێت: باسمان لە برەودان بە پەیوەندیییەکانمان و تاوتوێی گۆڕانکارییەکانى ناوچەکە کردوە.

هەواڵ:KNNC

دواى سەردانەکەى بۆ ئەنقەرە، مەسرور بارزانى، لەگەڵ رەجەب تەیب ئەردۆغان، سەرۆککۆمارى تورکیا کۆبونەوە و دواتر لەبارەى ناوەڕۆکى کۆبونەوەکەیانەوە سەرۆکى حکومەتى هەرێم رایگەیاند؛ بەهێزکردنی پەیوەندیی دولایەنە و دوایین پەرەسەندن و پێشهاتەکانی عێراق و گۆڕانکارییەکانی ناوچەکە و سووریامان تاوتوێ کرد.

ئاماژەى بۆ ئەوەشکردوە کە لەبارەى دۆخى سوریاوە هەردولایان هاوڕا بون لەسەر پێویستی پاراستنی ئارامیی و ئاسایش و مافی گشت پێکهاتەکانی ئەو وڵاتە.

ئەوەشخراوەتەڕو کە هەردولا باسیان لە گرنگیی چارەسەرکردنى کێشەکانى نێوان هەرێمى کوردستان و فیدراڵ لەسەر بنەماى دەستور و ئاستەنگەکانى بەردەم هەناردەکردنەوەی نەوتی هەرێمی کوردستان کردەوە.

هەر لە درێژەى سەردانەکەیدا، مەسرور بارزانى، لەگەڵ هاکان فیدان کۆبوەتەوە و لەوبارەیەوە بڵاویکردوەتەوە  کە گفتوگۆیان لەبارەی بره‌ودان به‌ په‌يوه‌ندييه‌كانى هه‌رێمى كوردستان و تورکیا و دوایین پەرەسەندنەکانی بارودۆخی گشتی عێراق و ناوچەکە کردوە.