فڕۆکە جەنگییەکانی سوپای تورکیا، گوندەکانی دەوروبەری بەنداوی تشرین لە مەنبج بۆردومان دەکەن، هەسەدەش فڕۆکەیەکی بێفڕۆکەوانی بەیرەقداری تورکیای خستەخوارەوە.

هەواڵ:KNNC

میدیاکانی رۆژئاوای کوردستان بڵاویانکردەوە، تورکیا بە فڕۆکەی جەنگی دەوروبەری بەنداوی تشرینی بۆردومانکرد و هاوکات چەندین گوندی سەر بە سلوکی، بەچڕی تۆپبارانکرد.

لەلایەکی دیکەوە، تورکیا و چەکدارە هاوپەیمانەکانی، گوندەکانی مخلەت، ئوم ئەل بەرامیل و حەمیدیەی سەر بە شاری سلوکی-ـیان لە کانتۆنی جزیرە بەچڕی تۆپبارانکرد. 

هەروەها، شەوی رابردو شەڕڤانانی هەسەدە لە دەوروبەری بەنداوی تشرین لە باشوری کۆبانێ، فڕۆکەیەکی بێفڕۆکەوانی تورکیایان لە جۆری بەیرەقدار TB2، خستەخوارەوە و لەهەمانکاتدا چەند هێرشێکی گروپە چەکدارەکانیان بۆسەر بەنداوەکە تێکشکاند.

روانگەی سوری-ـیش بۆ مافەکانی مرۆڤ رایگەیاند، ئەمڕۆ لە ئەنجامی هێرشی گروپە چەکدارەکانی سەر بە تورکیا بۆسەر شاری دێرحافز، سێ چەکداری ئەو گروپانە کوژراون.