بەپێی زانیارییەکانی KNN، حکومەتی هەرێم ئامادەیە داهاتی ناوخۆ ڕادەست بکات بەرامبەر ناردنی موچەی مانگی 12، هاوکات بڕیارە نوێنەرە کوردەکانی ئەنجومەنی نوێنەرانی عێراق لەگەڵ مەسرور بارزانی بۆ چارەسەری کێشەکان کۆببنەوە.

هەواڵ:KNNC

ئەمڕۆ چوارشەممە، ئەنجومەنی وەزیرانی هەرێم، یەکەمین کۆبونەوەی ساڵی 2025ـی ئەنجامدا و بابەتە دارییەکان و پرسی موچە تەوەری سەرەکی کۆبونەوەکە بون.

پەیامنێری KNN لە هەولێر رایگەیاند، لە ئێستادا وەزارەتی دارایی هەرێم ئامادەیە بۆ ڕادەستکردنی 250 ملیار دینار وەک داهاتی مانگەکانی تەمموز و ئاب و ئەیلول، تا لە بەرامبەردا بەغداد 805 ملیار دینار بۆ موچەی مانگی 12ی فەرمانبەران رەوانەبکات.

وتیشی: داهاتی ناوخۆی ئەو سێ مانگەی هەرێم بەپێی خەمڵاندنەکانی وەزارەتی دارایی عێراق بڕی 495 ملیار دینارە و ئەو جیاوازییەش یەکێکە لە کێشەکانی پرسی موچە، بۆ ئەو مەبەستەش بڕیار لە ئامادەکردنی نوسراوێک دراوە کە پشتبەست بە دو ماددەی یاسایی عێراق دەبەستێت و دارایی فیدراڵ پابەند دەکات بە ناردنی پارەکە.

هەربەپێی زانیارییەکانی KNN، بڕیارە لە دوای 15 مانگ شاندێکی هونەری لە وەزارەتی دارایی هەرێم لیستی موچەی مانگی یەک ببەنە بەغداد و تاوتوێی بەشە بودجەی ساڵی 2025 بکەن.

سەرچاوەیەک لە ئەنجومەنی وەزیران بە KNNـی راگەیاند، هەفتەی داهاتو سەرجەم نوێنەرە کوردەکانی ئەنجومەنی نوێنەرانی عێراق لەگەڵ سەرۆکایەتی حکومەتی هەرێم کۆببنەوە بە ئامانجی یەکدەنگی و هاوهەڵوێستی بۆ چارەسەری کێشەکانی نێوان هەولێر و بەغداد.

هەولێر- بڕیار نامیق