بەڕێوەبەرى جێبەجێکارى کۆمپانیاى مێتا ئاشکرایدەکات کە تۆڕە کۆمەڵایەتییەکانی سەربە کۆمپانیاکەیان لەماوەکانى داهاتودا گۆڕانکاریی گەورە بەخۆیانەوە دەبینن و دەڵێت: با بگەڕێینەوە بۆ سەرەتاکانى کارکردنمان.

تەکنەلۆژیان:KNNC

مارک زۆکەبێرگ، بەڕێوەبەرى جێبەجێکارى کۆمپانیاى مێتا لە لاپەڕەى تایبەتى خۆى گرتەیەکى بڵاوکردوەتەوە و بەڵێن دەدات دواى گەڕانەوەى دۆناڵد ترەمپ بۆ کۆشکى سپى، کارى لەپێشینەیان گرنگیدانى زیاتر دەبێت بە ئازادى رادەربڕین.

رونیکردوەتەوە کە سەرەتا لە ئەمەریکاوە دەستپێدەکەن و وردبینیکەرى راستییەکان لادەبەن و لەجێی ئەوە گرنگیی دەدەن بە تێبینییەکانى کۆمەڵگا (فیدباک)، هاوشێوەى تۆڕى کۆمەڵایەتیی ئێکس کە لەلایەن ئیلۆن مەسک خاوەندارێتى دەکرێت.

ئەوەى ئاشکرا کردوە کە پلاتفۆرمەکانى فەیسبوک و ئینستاگرام و سرێدس، بەشێوەیەکى بەرچاو چاودێرییەکانیان (سانسۆر) کەم دەبێتەوە و هانى بڵاوکردنەوەى بابەتە سیاسییەکانیش دەدەن لە پلاتفۆرمەکانیان.

ئەوەى خستوەتەڕو کە چاودێرەکانى مێتا لەڕوى سیاسییەوە لایەنگرییان هەبوە و متمانەیان لەناوبردوە لەجێی ئەوەى دروستى بکەن.

بەکارهێنەرانى مێتا، زیاتر لە سێ ملیار بەکارهێنەرن لە سەرانسەرى جیهاندا، لە ئێستادا بەکارهێنەران و لاثەڕە فەرمیی و کەسییەکان چاودێرى وردى بڵاوکراوەکانیان دەکرێت و ئەگەر لە سیاسەتەکانى ئەم کۆمپانیایە لابدرێت ئەوا لاپەڕە فەرمیی و کەسییەکان روبەڕوى سزا دەبنەوە، بەڕێوەبەرەکەشى بەڵێنیداوە، لەگەڵ دۆناڵد ترەمپ، سەرۆکى هەڵبژێردراوى ئەمەریکا روبەڕوى ئەو داوایانە ببنەوە کە سانسۆرى زیاتر دەسەپێنن.