کۆمپانیایەکی ژاپۆنی داهێنانی ئامێری مرۆڤ شۆردنی ڕاگەیاند، کە تەنها لە ماوەی 15 خولەکدا و بەتەنها 10 لیتر ئاو، بەبێ ئەوەی کەسەکە هیچ بکات تەواوی جەستە دەشۆرێت و وشکیشی دەکاتەوە.

هەواڵ: KNNC

 ئەم داهێنانە کە ناوی "Mirai Ningen Sentakuk" لێنراوە، لەلایەن کۆمپانیای زانستی ژاپۆنی دروستکراوە، ئامێرە پێشکەوتوەکە شەپۆلی سەرو دەنگی بەکاردەهێنێت بۆ شلکردنەوەی چڵکنی و پیسی، ئاو بۆ پاککردنەوەی قوڵ و هەڵمیش بۆ شێدارکردنەوە و گەنجکردنەوەی پێست.


ئامێرەکە وەک گەرماوێکی مۆدێرن وایە و بە بەکارهێنانی تەکنەلۆجیای پێشکەوتو و پشت بە زیرەکی دەستکرد دەبەستێت بۆ تێگەیشتن لە هەست و دۆخی بەکارهێنەر لەکاتی ششتنیدا.

لەڕێگەی ئاو و شامپۆی تایبەت بە خۆشۆردن و بڵقی هەواوە بە شێوازێکی مۆدێرن کرداری شوشتنەکە ئەنجامدەدات، بەدەم شۆردنەکەشەوە مەساجیش بۆ کەسەکە دەکات، لەگەڵ بژاردەی ئارامکەرەوەی وەک مۆسیقا و بۆن.

کۆمپانیاکە ڕایگەیاندوە، ئامانجی داهێنانەکە باشترکردنی چاودێری کەسی و پاشەکەوتکردنی کات و بەفیڕۆنەدانی ئاوە.

هەروەها کارئاسانیشە بۆ بەساڵاچوان و ئەو کەسانەی کە پێویستی تایبەتیان هەیە، ئەمەش نوێنەرایەتی هەنگاوێکی نوێ دەکات لە تێکەڵکردنی تەکنەلۆژیا لەگەڵ لوکسەکانی ڕۆژانە.

 کۆمپانیاکە جەختیکردوەتەوە ئامێرەکە دۆستی ژینگەیە، تەنها 10 لیتر ئاو بەکاردەهێنێت بۆ هەر خۆشۆردنێک و زیاتر لە 50% ئاو پاشەکەوت دەکات، بەراورد بە خۆشۆردنێکی ئاسایی.

لە ئێستادا لە ناوەندەکانی تەندروستی لە سەرانسەری ژاپۆن وەک تاقیکردنەوە بەکاردەهێنرێت و ئەم داهێنانە دەتوانێت تا ساڵی 2030 ببێتە شتێکی باو لە نێو هەمو ماڵەکاندا.