کەشناسێک پێشبینى دەکات لە ناوەڕاستى ئەم مانگەوە بارستەهەوایەکى ساردى جەمسەری لە سیبیریاوە زۆرینەى وڵاتانى رۆژهەڵاتى ناوەڕاست و هەرێمى کوردستان بگرێتەوە و لە 80%ـى ناوچەکانى هەرێمى کوردستان بەفر ببارێت هاوشێوەى بەفرەکەى ساڵى 2022.

هەواڵ:KNNC

هەڤاڵ سدیق، شارەزاى کەشوهەوا پێشبینى دەکات لە ناوەڕاستی مانگ بەدواوە هەرێمی کوردستان بکەوێتە ژێر کاریگەریی شەپۆلێکی سەرماوسۆڵەی بەهێز و شەپۆلێکی بەفربارینی چڕ بەشێکی زۆر لەوڵاتانی ڕۆژهەڵاتی ناوەڕاست بگرێتەوە .

بەپێی پێشبینییەکە؛ لەنێوان 18/1 بۆ 22/1 بارستە هەوایەکی ساردی جەمسەری زۆر بەهێز لەسیبیریاوە رو لە زۆرینەى وڵاتەکانى رۆژهەڵاتى ناوەڕاست و باکوری  کوردستان و رۆژهەڵاتی کوردستان و هەرێمی کوردستان و عێراق دەکات.

ئەو کەشناسە ئاماژەى بۆ ئەوەکردوە کە ئەگەر شەپۆلەکە گۆڕانکاریی بەسەردا نەیەت و وەک ئێستا بە بەهێزى بمێنێتەوە لەو ماوەیەدا پلەکانی گەرما لە زۆربەی ناوچەکانی هەرێم لەژێر سفری سیلیزییەوە دەبێت، شەپۆلێکی زۆر بەهێز و چڕی بەفربارین بەشێکی زۆری ناوچە جیاجیاکانی هەرێمی کوردستان  دەگرێتەوە و لە 70% بۆ 80%ـى ناوچە جیاوازەکانى هەرێمى کوردستان سپیپۆش دەبن.