لە بەغداد پێنج کەس دەستگیرکراون کە تۆمەتبارن بە کوشتنى خێزانێکى هەشت کەسیی و لەکاتى لێکۆڵینەوەشدا دانیان بە تاوانەکەیانداناوە و وتویانە: جگە لە تاوانى کوشتنەکە دزیشیان لە ماڵەکە کردوە.

هەواڵ:KNNC

پۆلیسى رەساف بڵاویکردەوە؛ لەگەڵ ئاگادارکردنەوەیان لە بونى روداوێکى کوشتن لە ناوچەى سەدر لە بەغداد، راستەوخۆ مەفرەزەکانیان چونەتە شوێنى روداوەکە و لەوێ سێ تەرمیان دۆزیوەتەوە کە ژنێک و دوو منداڵ بون.

ئاماژە بۆ ئەوەکراوە کە دواى دۆزینەوەى ئەو تەرمانە دەستیان بە لێکۆڵینەوەکانیان کردوە زانیارییەکانیان لەڕێی کامێراى چاودێرییەوە کۆکردوەتەوە  و بۆیان دەرکەوتوە کە بکوژەکە لە ناوچەى حەمیدیە دادەنیشێت.

پۆلیسى رەسافە لە راگەیەنراوەکەیدا دەڵێت: دواى وەرگرتنى رەزامەندیی یاسایی، چونەتە شوێنى مانەوەى بکوژەکە و توانیویانە لە ماڵەکەیدا خۆى و هاوسەرەکەى دەستگیر بکەن، بەڵام ئەوەى جێگەى سەرسوڕمان بوە ئەوەیە لە ماڵەکەیدا پێنج تەرمى دیکەیان دۆزیوەتەوە.

پۆلیس دەڵێت: بەهۆى دۆزینەوەى ئەو پێنج تەرمەوە تەواوى ئەندامانى ئەو ماڵەیان دەستگیر کردوە و دواى ئەوەى لێکۆڵینەوەشیان لەگەڵ کردون کە ئەو تەرمانە سەر بە هەمان ئەو خێزانەن کە لەسەرى دەستگیر کراون و دواى ئەوەى بەزۆر بردویانن بۆ ماڵى خۆیان هەرلەوێ کوشتویانن.

بەپێی زانیارییەکانى پۆلیسى رەسافە، ئەم تاوانە بۆ ئەوە ئەنجامدراوە کە بڕێک پارەیان لاى قوربانییەکان بوە چون وەریبگرنەوە و دزیشیان لە ماڵەکە کردوە لەگەڵ ئەنجامدانى تاوانەکەدا.