سەرۆکوەزیرانی عێراق رایگەیاند، هیچ کەسێک مافی ئەوەی نییە و گۆڕانکاری و چاکسازییمان لە هیچ دۆخێکی ئابوری ئەمنیدا بەسەردا بسەپێنێت، سەبارەت بە روداوەکانی سوریاش دەڵێت: لەسەرەتاوە عێراق بێلایەنی هەڵبژاردوە.

هەواڵ:KNNC

محەمەد شیاع سودانی، سەرۆکوەزیرانی عێراق رایگەیاند، لەسەرەتای روداوەکانی سوریاوە مەبەستیان بوە عێراق لەلایەنگیری بەرامبەر حیزبێک یان گروپێک دوربخەنەوە و هەڵبژاردنیش بۆ سورییەکان بەجێبهێڵن تا چارەنوسی خۆیان یەکلایی بکەنەوە.

وتیشی: کەسانێک هەن هەوڵیاندا گۆڕانکاری لە سوریا ببەستنەوە بە گۆڕینی سیستمی سیاسی عێراقەوە کە ئەوەش شتێکە بواری گفتگۆی تێدا نییە، چونکە نەمانویستوە عێراق ببێتە گۆڕەپانی شەڕ.

ئاماژەی بەوەشکردوە، زیاتر لە 60%ـی بەرنامەی حکومەتەکەیان لە بواری چاکسازی و ئابوری و کارگێڕی بەئەنجام گەیاندوە و بەردەوامیش دەبن لەسەر ئەنجامدانی چاکسازی لە دامو دەزگا ئەمنییەکان لەرێگەی لیژنەی باڵا-ـەوە.

سودانی داواش لە وڵاتانی جیهان دەکات، چاو بە یاساکانیان بخشێننەوە و دەستدرێژییەکان بۆسەر خەڵکی مەدەنی لە غەززە و لوبنان رابگیرێن.

 داوا لە جیهان دەکەین چاو بە یاساکانی خۆیدا بخشێنێتەوە کە چیتر توانای ڕێگریکردن لە دەستدرێژی و نادادپەروەرییان نییە و پەلە بکەن لە یارمەتیدانی خەڵکی سڤیل لە غەززە و لوبنان، کە لە بارودۆخێکی سەختدا ژیان بەسەر دەبەن.