سوپای روسیا رایدەگەیەنێت: لەپێشڕەوییە سەربازییەكانیان بەردەوامن و کۆنترۆڵی شارۆچكەیەكیان لە ناوچەی لوهانسکی دۆنباسیان کردوە، هاوكات وەزارەتی بەرگر ئاشكرایدەكات؛ لەلایەن ئۆكرانیاوە چەند ناوچەیەكی وڵاتەكەیان  بەموشەكی ئەمەریكی بەئامانج گیراون.


هەواڵ: (KNNC)


ئەمڕۆ شەممە، سوپای روسیا بڵاویكردەوە؛ لەپێشڕەوییە سەربازییەكانیان بەردەوامن و لەنوێترین پێشهاتیشدا، سوپای وڵات توانیویانە كۆنترۆڵی شارۆچكەی "نادیە" لە ناوچەی لوگانسکی رۆژهەڵاتی ئۆکرانیا بكەن، هەروەها هێزەکانی گروپی "باکور"ـی روسیا، بە ئاراستەی خارکیڤ، چەند لیوایەکی سەر بە هێزەکانی ئۆکرانیایان لە ناوچەکانی تورۆڤۆ، پێرۆڤسک و سێنێلنیکۆڤۆ لە پارێزگای خارکیڤ کردە بەئامانج گرتوە.


هاوكات، وەزارەتی بەرگری روسیا رایگەیاندوە: سوپا توانیویەتی زیانی گەورە بە هێزەکانی ئۆکرانیا بگەیەنێت كە زیاتر لە (50) سەربازیان كوشتوە لەگەڵ دەست بەسەردا گرتنی ژمارەیەك تانک، شەش ئۆتۆمبێلی سەربازی و چوارتۆپخانە.


بڵاوكراوەكەی وەزارەتی بەرگری ئەو وڵاتە ئاماژەی بەوەشکردوە، لەدرێژەی روبەڕوبونەكانی چەكدارانی ئۆكرانیا، چەند ناوچەكەی وڵاتەكەیان لەلایەن ئۆكرانیاوە و بە هەشت موشەكی (ئاتاكۆمی) دروستكراوی ویلایەتە یەكگرتوەكانی ئەمەریكا بەئامانج گیراوە، بەڵام لەلایەن سیستەمی بەرگرییەوە رێگری لە پێكانی ئامانجەكانیان گیراوە.