لە یەکەم ڕۆژی ساڵی نوێدا ئەمریکا کۆمەڵێک سزای نوێی بەسەر هەر یەک لە ڕوسیا و ئێران سەپاند و بڕیارە لە چەند ڕۆژی داهاتوشدا کۆمەڵێک سزای نوێی دیکە ڕابگەیەنێت.

هەواڵ:KNNC

ئاژانسی هەواڵی ڕۆیتەرز لە زاری وەزارەتی خەزێنەی ئەمریکاوە بڵاویکردوەتەوە، کۆمەڵێک سزای قورس و نوێیان بەسەر ئەو دامەزراوە ئێرانیانە سەپاندوە کە پەیوەندیان بە سوپای پاسداران هەیە لەگەڵ کۆمەڵێک دامەزاروەی دیکەی حکومەتی ڕوسیا.

ئاژانسەکە ڕاشیگەیاندوە، سزاکان لەسەر بنەمای بونی بەڵگەی تێوەگلانی ئێران و ڕوسیا لە دزە پێکردن و بڵاوکردنەوەی زانیاری لەسەر هەڵبژاردنەکانی ئەمریکا، پێدانی زانیاری هەڵە لەسەر هەڵبژاردنەکان بۆ ڕای گشتی و بڕیارە لە چەند ڕۆژی داهاتودا سزای دیکە دەربکرێت.

باسی لەوەشکردوە، سزاکانی دژی ئێران لەگەڵ دەستبەکاربونی دۆناڵد ترەمپ زیاتر دەبن.

نوێنەری ئێران لە نەتەوە یەکگرتوەکان ڕەتیکردوەتەوە هیچ لێدوانێک لەسەر بڕیاری سزاکانی ئەمریکا بدات، لە کاتێکدا نوێنەری ڕوسیا بە تەواوی ئەو تۆمەتانەی ڕەتکردوتەوە کە باسی لێوەکراوە.