ئەندامێکى ئەنجومەنى نوێنەرانى عێراق ئاشکرایدەکان کە هەردو بانکى رەشید و رافیدەین ئامادەییان دەربڕیوە تەوتینى موچەى فەرمانبەرانى هەرێمى کوردستان بکەن.

هەواڵ:KNNC

سۆران عومەر، ئەندامى ئەنجومەنى نوێنەرانى عێراق بڵاویکردەوە؛ داوام لە وەزارەتی دارایی عێراق کرد کاتێک لیستی موچەی فەرمانبەرانی هەرێم لە ساڵی 2025 کێشەی تێدا نامێنێت لیستەکان رەوانەی بانکی رەشید و رافیدەین بکات بۆ تەوتین.


ئاماژەى بۆ ئەوەکردوە کە  لە وەڵامى وەزارەتى دارایی عێراقدا بانکی رەشید بەنوسراوی ژمارە (٣٧٣ لە١٩/١/٢٠٢٥) دەڵێت: ئامادەیی تەواومان هەیە بۆ تەوتینی موچەی فەرمانبەرانی هەرێم و چاوەڕێین گرێبەستی نێوان بانکەکەمان و فەرمانگەکانی پەیوەندیدار بکرێت، کاتێک 6 زانیاری فەرمانبەرمان پێ بگات لەڕێی ئەپێکی تایبەت بە بانکەوە لەموبایلەوە کارتی بانکی توطين کارادەکرێت و بۆ دابەشکردنیش دەتوانرێ لەڕێی لقی بانکە ئەهلیەکان و دەروازەکانەوە موچەکە وەربگرن.

دەشڵێت: بانکی رافیدەین بەنوسراوی ژمارە (٣/١/١٢٨ لە ١٩/١/٢٠٢٥) ئاماژە بەوە دەکات ئامادەن بۆ تەوتينی موچەی فەرمانبەرانی هەرێم و دەرکردنی ماستەرکارتی جیهانی و کارتی ناوخۆیی و وەرگرتنی موچە لەڕێی بانکە ئەهلیە رێپێدراوەکان.

ئەوەش لەکاتێکدایە، بەیانى ئەمڕۆ وەزارەتى دارایی عێراق جەختى کردەوە کە بۆ ناردنى موچەى فەرمانبەرانى هەرێم 30 رۆژ جارێک دەبێت پرۆسەى تەوتین ئەنجام بدرێت و تا ئێستاش هەرێمى  کوردستان ئەنجامى نەداوە.