پڕۆسەیەكی تری ئازادكردنی بارمتە و زیندانییەكان بەپێی ئاگربەستی غەززە بەڕێوەدەچێت، بزوتنەوەی حەمماس سێ بارمتەی ئازاد كرد و بڕیاریشە ئیسرائیل دەیان زیندانی فەڵەستینی ئازاد بكات.

هەواڵ:KNNC

ئەمڕۆ بزوتنەوەی حەمماس و ئیسرائیل لە چوارچێوەى رێککەوتنى ئاگربەستى غەززەدا و لە قۆناغى پێنجەمی ئازادکردنى بارمتە و زیندانیەكان، ژمارەیەک دیل و بارمتە ئازاد دەکەن.

بڕیارە بزوتنەوەی حەمماس لە مەراسیمێكدا، سێ بارمتەی ئیسرائیلی رادەستی نوێنەرانی خاچی سوری نێودەوڵەتی بکات لە غەززە كە یەكێكیان رەگەزنامەی ئەڵمانی هەیە و  حكومەتی ئیسرائیلیش 183 بەندكراوی فەڵەستینی ئازاد بكات.

لەدوای ئەوەی ئاگربەستی غەززە لە رێكەوتی 19ی مانگی رابردو كەوتە بواری جێبەجێكردنەوە، تا ئێستا چوار وەجبەی ئازادكردنی بارمتە و زیندانیەكان لەنێوان بزوتنەوەی حەمماس و ئیسرائیل بەڕێوەچوە و 18 بارمتە و 600 زیندانی ئازاد كراون.