فشارەکانی ئەمەریکا بۆ دەستپێکردنەوەی هەناردەی نەوتی هەرێمی کوردستان بەردەوامن، بەشێک لە میدیا عەرەبییەکانیش دەڵێن: ئەمەریکا دەیەوێت لەڕیگەى هەناردەکردنى نەوتى هەرێمەوە رێگە لە هەناردەکردنى نەوتى ئێران بگرێت سەرۆک وەزیرانی عێراقیش دەڵێت: بە هەناردەکردنەوەی نەوتی هەرێمی کوردستان موچە و شاییستە داراییەکانی هاوڵاتییان، مسۆگەر دەبن.


راپۆرت: (KNNC)

لە دوای دەستێوەردانەکانی ئەمەریکا و بەشێکی دیکە لە وڵاتان، هەنگاوەکان بۆ دەستپێکردنەوەی هەناردەی نەوتی هەرێمی کوردستان، خێراتر بون، پرۆسەیەک، کە چارەسەرى گەورەترین کێشەى دارایی نێوان هەولێر و بەغدادى لێ چاوەڕوان دەکرێت.


نزیکەی دو ساڵە، هەناردەی نەوتی هەرێمی کوردستان بۆ بەندەری جەیهان، ڕاگیراوە و لە و ماوەیەدا، بەردەوام کێشەکانی نێوان هەولێر و بەغداد، ڕوی لە زیادبون کردوە، بەڵام ئێستا و دوای فشارەکانی ئەمەریکا، هەریەکە لە حکومەتی عێراق و هەرێمی کوردستان گەیشتونەتە ڕێکەوتن بۆ دەستپێکردنەوەی هەناردەی نەوت.


محەممەد شیاع سودانی، سەرۆک وەزیرانی عێراق، لە نوێترین لێدوانیدا ڕایگەیاند: کابینەکەی توانیویەتی، چارەسەری کێشەکانی نێوان هەولێر و بەغداد، بەرەو هەمیشەیی ببەرێت و کێشە هەڵپەسێردراوەکان لە سیاسییەوە بگۆڕیت بۆ یاسایی و چارەسەریی ڕیشەیی.

وتیشی: ئێستا کار بۆ هەناردەکردنەوەی نەوتی هەرێمی کوردستان دەکەن، کە ئەوەش هاوڵاتییان لێی سودمەند دەبن و موچە و شاییستە داراییەکانیان، مسۆگەر دەکرێت.

لای خۆشییەوە، نێچیرڤان بارزانی، سەرۆکی هەرێمی کوردستان رایگەیاند: ئەوان وەک کاڵای بازرگانی، سەیری نەوت دەکەن، نەک سیاسی، ئێستا تورکیاش ئامادەیە و چاوەڕێ دەکەن لە ماوەیەکی نزیکدا، نەوتی هەرێمی کوردستان، رەوانەی بەندەری جەیهان بکرێت.

وتەکانی سودانی و بارزانی دوای ئەوە هاتن، کە وەزیری دەرەوەی ئەمەریکا، لە پەیوەندییەکی تەلەفونیدا لەگەڵ سەرۆك وەزیرانی عێراق، جەختی کردەوە لە زو دەستپێکردنەوەی هەناردەکردنی نەوتی هەرێمی کوردستان، لە ڕێگەی بۆریی عێراق –  تورکیاوە.

وەزیری دەرەوەی ئەمەریکا، ئەوەیشی بە سودانی وتوە: پێویستە ڕێز لە مەرجی گرێبەستە نەوتییەکانی کۆمپانیا ئەمەریکییەکان بگیرێت کە لە هەرێمی کوردستان و عێراق کار دەکەن، لەپێناو ڕاکێشانی وەبەرهێنانی زیاتری ئەمەریکی بۆ وڵاتەکە، هەروەک شارەزایەکی ئابوریی عێراقییش دەڵێت: ئەستەمە، نەوتی کوردستان لە ڕێگەی بەندەری جەیهانی تورکیاوە، هەناردە بکرێتەوە بەبێ ئەوەی بگەنە ڕێککەوتنی نوسراو لەگەڵ کۆمپانیا بیانییەکان کە لە ناوچەکەدا کاردەکەن.

ڕۆژنامەی عەرەبی جەدید لە ڕاپۆرتێکیدا دەڵێت: ئەمریكا پێیوایە، ڕێککەوتنی نەوتی نێوان بەغداد و هەولێر، زیان بە ئێران دەگەیەنێت، بەو پێیەی رۆژانە نزیکەی (200) هەزار بەرمیل نەوتی خاوی هەرێمى کوردستان بە نرخێکی هەرزان و بە قاچاغ هەناردەی ئێران کراوە.


هەرچەندە فشارەکانی ئەمەریکا بەردەوامن و هەولێر و بەغدادیش ڕێک کەوتون لەسەر دەستپێکردنەوەی هەناردەی نەوت، بەڵام بەشێک لە میدیا عەرەبی و جیهانییەکان باس لەوە دەکەن، دواکەوتنی پڕۆسەکە، دو هۆکاری سەرەکی هەیە کە یەکەمیان داواکاریی تورکیایە بۆ قەرەبوکردنەوەی پێبژاردنەکانی کە ملیارێک و 500 ملیۆن دۆلارە، هۆکاری دوەمیش داواکاریی کۆمەڵەى پیشەزسازى نەوتى کوردستان - ئەپیکۆرە بۆ واژۆکردنی ڕێککەوتننامەیەکی نوسراو کە مافی کۆمپانیا بیانییەکان لە کوردستان گەرەنتی دەکات.


راپۆرت؛ ئارام حەمەعەلی