لە شەڕی نێوان گروپە چەکدارەکان و هێزە ئەمنییەکانی سوریا زیاتر لە 200 کەس بونەتە قوربانی، روانگەی سوری بۆ مافەکانی مرۆڤ رایگەیاند، هێزەکانی ئاسایشی ناوخۆی سوریا گروپێکی سەربازییان دەستگیرکردوە کە پێشێلکارییان دژ بە هاوڵاتییانی مەدەنی ئەنجامداوە.

هەواڵ:KNNC

روانگەی سوری بۆ مافەکانی مرۆڤ ئەمڕۆ شەممە ئاماری قوربانیانی روداوەکانی سوریای بڵاوکردەوە و رایگەیاند، زیاتر لە 200 کەس لە گوندەکانی کەناراوەکانی سوریا بەهۆی شەڕی نێوان گروپە چەکدارەکان و هێزە ئەمنییەکانی سوریا بونەتەقوربانی.

هەر لەو روداوانەدا، 34 ئەندامی هێزە ئەمنییەکانی سوریا کوژراون، هاوکات هێزەکانی ئاسایشی ناوخۆ دەستگیرکردنی گروپێکی سەربازی راگەیاند، کە پێشێلکارییان بەرامبەر هاوڵاتییانی مەدەنی ئەنجامداوە.

هەربەپێی ئامارەکانی روانگەی سوری، 42 ئەندامی گروپە چەکدارەکان لە گوندەکانی لازقیە و جەبلە کوژراون.

لەلایەکی دیکەوە، ئاسایشی گشتی سوریا رایگەیاند، ئەو رێگایانەیان داخستوە کە بەرەو کەناراوەکان دەڕۆن.

روداوەکانی سوریا لەدوای ئەوە دەستیپێکرد، کاتێک چەکدارانی لایەنگری ئەسەد هێزە ئەمنییەکانی حکومەتی نوێی سوریایان خستە بۆسەیەکەوە و 15 کەسیان لێکوژرا، شەڕەکە لە پارێزگا کەنارییەکانی رۆژئاوای سوریا رویدا، کە بە مەڵبەندی کەمینەی عەلەوی، پێکهاتەکەی بنەماڵەی ئەسەد دادەنرێت.