سەرۆكی لیژنەی تەندروستی و ژینگەی پەرلەمانی عێراق هۆشداریدا لە دەرەنجامەكانی جەنگی بازرگانی لەسەر وڵاتەكەی، دەڵێت گەورەترین زەرەرمەند لە دابەزینی نرخی نەوت عێراقە.

هەواڵ:KNNC

ماجید شنگالی، رایگەیاند: لەماوەی 48 كاتژمێردا نرخی نەوتی خاوی برێنت 10 دۆلار دابەزی و گەورەترین زەرەرمەند لەو دابەزینە عێراقە كە بەڕێژەیەكی زۆر پشت بە داهاتی نەوت دەبەستێت بۆ بوجەی گشتی و 90% تێدەپەڕێنێت.

وتیشی: كاتێك باسی مەترسییەكانی بڕیارەكانی سەرۆكی ئەمریكا بۆ سەپاندنی باجی گومرگی بەسەر وڵاتان دەكەن، هەندێك لە هەرزەكارانی سیاسی ڕەخنەدەگرن، بەبێ ئەوەی زانیاری و تێگەیشتنیان هەبێت بۆ واقیع و ئەوەی ڕودەدات لەسەر ئاستی هەرێمایەتی و نێودەوڵەتی.

ئەمە یەكەمجار نیە تارمایی هەرەسهێنانی بازاڕی نەوت هەڕەشە لەسەر عێراق دروست بكات و چەند جارێك ئەم هەڕەشەیە دروستبوە بەهۆی ئەوەی پشت بە داهاتی نەوت دەبەستێت و نەیتوانیوە سەرچاوەكانی داهات فرەچەشن بكات.