لیواکانی عیزددین ئەلقەسام، باڵی سەربازی بزوتنەوەی حەماس، گرتەیەکی ڤیدیۆیان بڵاوکردوەتەوە، کە دوو بارمەتی ئیسرائیلن و داوا دەکەن وڵاتەکەیان هێرشەکانی رابگرێت بۆ سەر غەززە و حەماسیش دەڵێت؛ کات تەواو دەبێت.

هەواڵ:KNNC


لەو گرتە ڤیدۆییەدا کە دو بارمتەی ئیسرائیلی تێدایە و لەلایەن لیواکانی قەسامەوە دەستبەسەرکراون، بارمتەکان باس لەوە دەکەن ژیانیان لە مەترسیدایە بەهۆی بۆردومانەکانی ئیسرائیلەوە، باسیان لەوە کردوە،  ئەمرۆ  لە کاتی دەرچونیان لە تونێلەکان بۆ وەرگرتنی هەندێک هەوا کە پێویستیان بوە، توشی تۆپبارانی سوپای ئیسرائیل بون .

ئەو دوو بارمەتە ئیسرائیلییە ئاماژەیان بەوەشکردوە، ئەو شوێنەی کە تێیدان سەلامەت نییە و هیچ خواردن و خواردنەوە و پێداویستییەکی خەوتنیشی تێدا نییە، جەختیانکردوەتەوە  بەردەوام ژیانیان لە مەترسیدایە.

ئەوان جەختیان لەوە کردوەتەوە کە "چەکدارانی حەماس ژیانی خۆیان دەخەنە مەترسییەوە بۆ ئەوەی بتوانن  لە دەرەوەی تونێلەکە هەناسە بدەین، لەکاتێکدا سوپای وڵاتەکەمان  بۆردومانمان دەکات".

داواشیان کردوە لە هاوڵاتیانی وڵاتەکەیان،  فشار بخرێتە سەر بنیامین ناتانیاهۆ، سەرۆکوەزیرانی ئیسرائیل بۆ ئەوەی بە زیندویی بگەڕێننەوە سەر ماڵ و حاڵی خۆیان و لە کۆتایی تۆمارەکەشدا دەڵێن؛ " زیندومان بکەنەوە، ئێمە لێرە مردوین".