فەرماندەی گشتیی سوپای پاسدارانی ئێران، ئامادەیى هێزەکانى وڵاتەکەى بۆ هەر جۆرە شەڕێک دەردەبڕێت، دەشڵێت، فەیلەقی قودس لە یەک کاتدا لە چەندین بەرەدا لە یەمەن، عێراق، لوبنان و فەلەستین شەڕی کردوە.

هەواڵ:KNNC

حوسێن سەلامی، فەرماندەی گشتیی سوپای پاسداران لە کۆبونەوەیەکدا لەگەڵ فەرماندەکانی سوپا و بەرپرسانی سەربازی ئەو وڵاتە رایگەیاند، ساڵی رابردو ساڵێکی پڕ لە هەوراز و نشێوی زۆر قورس، گەورە و سەخت بو بۆ ئێران و سوپای پاسداران.

فەرماندەی گشتیی سوپای پاسدارانی ئێران، بۆ یەکەمجار دانی بەوەدانا کە فەیلەقى قودس لە یەک کاتدا لە چەندین بەرەدا لە یەمەن، عێراق، لوبنان و فەلەستین لە جەنگدا بوە.

حوسێن سەلامی رەتیکردەوە، روداوەکانی ناوچەکە و بەتایبەتى روخانی رژێمی بەشار ئەسەد ئێرانی لاواز کردبێت.

دەشڵێت: هێزە چەکدارەکانی ئێران بۆ ئەگەری هەر شەڕێک ئامادەن، بەڵام دەستپێشخەرى ناکەن، دوپاتیشیکردەوە بۆ یەک هەنگاویش لە بەرامبەر دوژمن پاشەکشە ناکەن.