کۆمپانیایەکی گەشتیاری لە سلێمانی، بڕی 300 دەفتەر (سێ ملیۆن دۆلار)ی لە هاوڵاتییان وەرگرتوە بەناوی ئەنجامدانی مامەڵەی وەرگرتنی ڤیزای گەشتیاری، بەڵام خاوەنی کۆمپانیاکە هەڵاتوە.

هەواڵ:KNNC

ئەمڕۆ ژمارەیەک هاوڵاتیی لەبەردەم کۆمپانیایەکی گەشتیاری گردبونەوە و بەشێک لەو هاوڵاتییانە بە دیجیتاڵ میدیای کەی ئێن ئێنیان وت: ژمارەیان زیاتر لە 100 خێزانە و بەشێکیان زیاتر لە شەش دەفتەر دۆلاریان داوەتە کۆمپانیایەکی گەشتیاری بەمەبەستی ئەنجامدانی مامەڵەی ڤیزای گەشتیاری بۆ وڵاتانی ئەوروپا، بەڵام خاوەنی کۆمپانیاکە هەڵاتوە و پارەکانیشیان دیار نەماوە و زۆرینەشیان وەڵامی مامەڵەکەیان رەتکراوەتەوە.

دەشڵێن: زۆرینەیان ماڵ، ئۆتۆمبێل، زێر و خانویان فرۆشتوە بۆ دابینکردنی ئەو بڕە پارەیە، بەڵام زیاتر لە سێ مانگە دەستی دەستیان پێدەکرێت و نازانن داوای پارەکانیان لە کێ بکەنەوە.

بە وتەی ئەو هاوڵاتییانە، ئەو کۆمپانیایە، پارەی ئەوانی بەکارهێناوە و کردویەتییە بۆرسەوە و بازرگانی پێوەکردوە.

دەشڵێن: ماوەی سێ مانگە سکاڵایان تۆمارکردوە، بەڵام تا ئێستا وەڵامی سکاڵاکەیان نەدراوەتەوە و کەسێکیش بە تۆمەتی بردنی ئەو پارەیە دەستگیراوە، بەڵام بەبێ ئازادکراوە.