ڤاندام بە دەستدرێژی سێکسی و بازرگانیکردن بە مرۆڤەوە تۆمەتبار دەکرێت

KNN : Kurdish News Network
05:27 - 05/04/2025
هەمەڕەنگ
+
-


تۆمەتبارکردنی ڤاندام، ئەستێرەتی فیلمی ئەکشن هۆلیودی هەژاندوە؛ ئەستێرە سینەماییەکە  لە ڕۆمانیا ڕوبەڕوی تۆمەتێکی شۆکهێنەر بوەتەوە کە پەیوەندییان بەدەستدرێژی  سێکسی و بازرگانیکردن بە مرۆڤەوە هەیە و تا ئێستا خودی ڤاندام بێدەنگە.

هەمەڕەنگ:KNNC


پێگەی ئیندیپێنت بڵاویکردوەتەوە، ئەکتەری سینەمای جان کلۆد ڤاندام تۆمەتبار کراوە بەوەی ژمارەیەک ژنی ڕۆمانی وەک "دیاری" لە شاری کانی فەرەنسا وەرگرتوە، زانیارییەکان باس لەوە دەکەن پێشتر ئاگاداری ئەوە بوە کە لە گروپێکی بازرگانیکردنەوە هاتون و ڕەنگە لە چەند رۆژی داهاتوشدا  بانگێشتی بەردەم دادگا بکرێت.


بەپێی زانیارییەکان ئەو ئەکتەرە بەلجیکییە تەمەن 64 ساڵە تۆمەتبار کراوە بە پەیوەندی سێکسی نایاسایی لەگەڵ پێنج ژنی ڕۆمانی کە قوربانیی باندێکی تاوانکاری بون بە سەرۆکایەتی بازرگانێکی ڕۆمانی و گەرچی تائێستا ڤاندام بێدەنگە، بەڵام ئەم هەواڵەش بوەتە رۆژەڤی میدیا جیهانییەکان .


بەپێی ئەو سکاڵا تاوانکارییەی کە لە بەڕێوەبەرایەتی لێکۆڵینەوە لە تاوانی ڕێکخراو و تیرۆری ڕۆمانی (DIICOT) تۆمارکراوە دژی ڤاندام، ئەو پێنج ژنە لە میانی فێستیڤاڵی فیلمی کان لە فەرەنسا وەک "دیاری" پێشکەش بە ئەکتەرەکە  کراون، کە پێشتر وەک مۆدێل کاریان کردوە.


لای خۆیەوە ئادریان کۆکۆلیس کە پارێزەری یەکێکە  لە قوربانییەکان، پشتڕاستی کردەوە کە ئەو ژنانە لە دۆخێکی سەختی کۆمەڵایەتی و ئابوریدا بون و  بە وتەی شایەتحاڵەکان، ڤان دام پێشتر زانیاری هەبوە لەسەر ژنەکان و زانیویەتی لەلایەن تۆڕی تاوانکارییەوە بەکاردەهێنرێن.

ئەم دۆسیەیە لە چوارچێوەی لێکۆڵینەوەیەکی بەرفراوانتری ڕۆمانیادا دێت کە لە ساڵی 2020 لە تۆڕی پوگلیا دەستیپێکردوە کە تۆمەتبارە بە بازرگانیکردن بە مرۆڤ و دەستدرێژی سێکسی  بۆسەر منداڵان و کەسانی  خوار تەمەنی یاسایی.

بەو پێیەی ڕوداوەکە لە فەرەنسا ڕویداوە، ڕێوشوێنی یاسایی پێویستی بە ڕەزامەندی دادگاکانی فەرەنسا هەیە بۆ گواستنەوەی لێکۆڵینەوەکە بۆ ڕۆمانیا، لەوێش ڕەنگە ڤان دام بانگهێشت بکرێت بۆ ئەوەی شایەتحاڵی بدات.

ئەوەی جێی سەرنجە، تا ئێستا هیچ وەڵامێکی فەرمی لەلایەن پارێزەرانی ڤاندام یان (DIICOT) نەدراوەتەوە، سەرەڕای ئەوەی هەواڵەکە بە شێوەیەکی بەرفراوان لە میدیا جیهانییەکاندا  بڵاوبوەتەوە.

462 جار خوێندراوەتەوە