مەسعود پزیشکیان، سەرۆک کۆماری ئێران وەڵامی ترەمپی داوەتەوە و  رایگەیاندوە؛ تاران لە پێگەیەکی یەکساندا ئامادەیە بۆ دانوستان، نەکە لەژێر مەرجی هەڕەشەکردندا، وتوشیەتی؛ ئەمەریکا تەنها نیازی زەلیلکردنی ئێرانی نییە، دەیەوێت تەواوی جیهان زەلیل بێت.


هەواڵ: KNNC


ئەمرۆ شەممە سەرۆک کۆماری ئێران،  لە دیدارێکدا لەگەڵ کۆمەڵێک لە بەڕێوەبەران و بەرپرسانی حکومەت کۆبویەوە و لە وەڵامی هەڕەشەکانی ترەمپدا جەختی کردەوە، تاران تەنها لە پێگەیەکی یەکساندا ئامادەیە بۆ گفتوگۆکردن و دانوستانیشی لە ژێر هەڕەشەدا بە شتێکی بێ مانا وەسف کردوە.

ئەو ڕوی لە سەرۆکی ئەمەریکا کردوە و دەڵێت؛ ئەگەر دانوستانتان دەوێت، هەڕەشەکردن سودی چییە؟

ناوبراو ڕەخنەی لە ئەمەریکا گرتوە و وتویەتی؛ "ئەمڕۆ ئەمەریکا تەنیا ئێران زەلیل ناکات، بەڵکو جیهانیش زەلیل دەکات و ئەم هەڵسوکەوتەش پێچەوانەی بانگەوازی دانوستانە".

هەروەها ئاماژەی بەوەشکردوە؛ "ئەگەر لە ناوخۆدا شەڕ نەکەین، پیلانگێڕی دەرەکی سەرکەوتو نابێت بەرامبەریان".

ئەم لێدوانانەی پزیشکیان لەدوای ئەوە دێت، لە چەند ڕۆژی ڕابردودا قسە و باسەکان سەبارەت بە ئەگەری هێرشی سەربازی بۆ سەر ئێران زیادی کردوە.

ڕۆژی پێنجشەممەی ڕابردو، دۆناڵد ترەمپ بانگەشەی ئەوەی کرد کە کۆماری ئیسلامی بەدوای وتوێژی ڕاستەوخۆ لەگەڵ ئەمەریکادا دەگەڕێت نەک لە ڕێگەی نێوەندگیرییەوە،  پێشوتریش هەڕەشەی بۆردومان کردنی بێوێنەی ئێرانی کردبو، لە ئەگەری ڕەتکردنەوەی دانوستان لەلایەن تارانەوە.