ڕێکخراوی مافی مرۆڤی ئێران ئاماری لە سێدارەدانی سێ مانگی سەرەتایی ئەمساڵی بڵاوکردەوە و بەگویرەی ئامارەکە  هەمو رۆژێک دوکەس زیاتر لە سێدارە دەدرێت و هۆشداریدەدات؛ بەراورد بە ساڵی ڕابردو ئامارەکە دوو هێندە زیادی کردوە.


هەواڵ:KNNC

ڕێکخراوەکە بنکەکەی لە جنێڤە و لە ڕاپۆرتێکدا ڕایگەیاندوە، لە ماوەی چارەکی یەکەمی ئەمساڵ دا،  ژمارەی ئەو کەسانەی لەسێدارەدراون  لە ئێران بەراورد بە هەمان ماوەی ساڵی ڕابردو دوو هێندە زیادی کردوە.


بە گوێرەی زانیاریەکانی رێکخراوەکە، تەنها لە سێ مانگی سەرەتای ئەمساڵ دا، لانیکەم 230 کەس لە سێدارە دراون کە هەشتیان  ژن بون.

 لەسێدارەدانەکان بە شێوەیەکی سەرەکی بە تۆمەتی کوشتن و تاوانی پەیوەست بە ماددە هۆشبەرەکان ئەنجام دراون، بە پێی ئەو ئامارانەی رێکخراوەکە بڵاویکردوەتەوە؛ لە هەمان ماوەی ساڵی ڕابردودا 110 کەس لە ئێران لە سێدارە دراون.

ئەمە لەکاتێكدایە تەنها لە مانگی ڕابردودا ،  لە تەواوی ئێراندا لانیکەم  59 کەس لە سێدارە دراون، کە حەوت هاوڵاتی بەلوچ،  سێ هاوڵاتی ئەفغانی و هاوڵاتییەکی کوردیشیان تێدابوە و  لەو  ژمارەیەش پێنجیان ژن بون.

لای خۆیەوە مەحمود ئەمیری، سەرۆکی ڕێکخراوی مافی مرۆڤ هۆشداری دا  لەوەی کە تاران ڕەنگە نیگەرانییەکانی سەبارەت بە ئەگەری ململانێ لەگەڵ ئەمەریکا بۆ زیادکردنی لەسێدارەکان بقۆزێتەوە.

ناوبراو باسی لەوەش کردوە، مەترسی زیادبونی بەرچاوی لەسێدارەدان  لە هەفتەکانی داهاتودا جدییە و  دەشڵێت؛ ڕەنگە دەسەڵاتدارانی ئێران وەک ئەوەی لە ڕابردودا ئەنجامیان داوە، سەرنجی گشتی لەسەر گرژییەکانی نێوان ئێران و ئەمەریکا بقۆزنەوە بۆ ئەنجامدانی ژمارەیەکی زیاتر لە سێدارەدان،  لەوانەش لەسێدارەدانی زیندانیانی سیاسی.

ڕێکخراوەکانی مافی مرۆڤ  بەردەوام کۆماری ئیسلامی ئێران  بەوە تۆمەتبار دەکەن کە سزای لە سێدارەدان وەک ئامرازێک بۆ دروستکردنی ترس و تیرۆر لە کۆمەڵگەدا بەکاردەهێنیت، بە تایبەت دوای ڕاپەڕینی جەماوەری "ژن، ژیان، ئازادی".

 ڕێکخراوەکە ئاماری ساڵی ڕابردوشی خستوەت ڕو کە تێیدا، کۆماری ئیسلامی لە ساڵی 2024دا لانیکەم 975 کەسی لە سێدارە داوە و ئامارەکانی سەرەتایی ئەمساڵیش ئاماژەن بۆ ئەوەی رێژەی لە سیدارەدان لە چاو ساڵانی رابردودا زیاتر دەبێت.