بزوتنەوەی گۆڕان پرسەنامەیەک ئاراستەی بنەماڵەی (کەمال عەلى محمود) ناسراو بە (کەمالى ئەلێ) دەکات و رایدەگەیەنێت؛ ئەم  ماڵئاوایکردنە بە یەکجاری بۆ هەموان جێگەی داخ و نیگەرانییە.

دەقی پرسەنامەکە؛

بەداخ و پەژارەیەکی زۆرەوە، هەواڵی کۆچی دوایی (کەمال عەلى محمود) ناسراو بە (کەمالى ئەلێ) تێکۆشەرى دێرین و زیندانی سیاسیی و هەڵسوڕاوى دیارى بزوتنەوەى گۆڕانمان پێگەیشت.

خوالێخۆشبوو، جگەلەوەی لە بنەماڵەیەکی تێکۆشەری سلێمانی و کوردستان بوو، لە رێکخستنە نهێنییەکانى کۆمەڵەى رەنجدەرانەوە دەستى بە خەبات و تێکۆشان کردووە، لە ژیانی پێشمەرگەیەتیشدا کەسێکی هەڵکەوتو و خاوەن بیروباوەڕی پتەوی کوردایەتی بووە، بەهۆی هەڵوێستەکانیشی لەلایەن ڕژێمی بەعسەوە دەستگیرکراوە و لەو ئەزمونەش نهێنیپارێز و هاوڕێکانی لە هەموو مەترسیەک پاراستووە.

لە دوای ڕاپەڕین، لەناو یەکێتی نیشتمانی کوردستاندا، چەندین بەرپرسیارێتی بینیوە، دواتریش لەگەڵ دروستبوونی بزوتنەوەی گۆڕاندا، هەر لە سەرەتاوە کەسایەتییەکی کاریگەر و هەڵسوڕاوێکی دیار و کاریگەر بووە. 

بەو بۆنە خەمناکەوە پرسە و سەرەخۆشى لە خۆمان و خانەوادە و كەسوكار و بنەماڵە تێکۆشەر و هاوڕێیانى خوالێخۆشبوو دەکەین. داواكارین لە خوای گەورە رۆحى بە بەهەشتی بەرین شاد بكات و سەبر و ئارامی بەهەموو لایەك ببەخشێ.

انا لله و انا الیه راجعون

بزوتنەوەی گۆڕان
5ی 4ى2025

ژیاننامەى کەمال عەلى محمود

- ساڵى (1949) لە شارى سلێمانى لەدایکبووە
- سەرەتاى کارى سیاسى لەناو بازنەى رۆشنبیرى کۆمەڵەى رەنجدەرانى کوردستان دەستیپێکردووە.
- ساڵى (1977) لەسەر بیروباوەڕى سیاسى لەلایەن رژێمى پێشووى بەعسەوە دەستگیرکراوە و (15)ساڵ حوکم دراوە، دواتر لەساڵى (1979) بە لێبوردنى گشتى ئازادکراوە.
- دواى ئازادکردنى پەیوەندى بە ریزەکانى هێزەکانى پیشمەرگەى کوردستان (یەکێتى نیشتمانى) کردووە و وەک پێشمەرگە و کادیرێکى پێشکەوتوو لە خەبات بەردەوامبووە تا راپەرینز
- لە ساڵى (2009) و لەکاتى دروسبوونى بزووتنەوەى گۆڕان یەکێک بووە لە هەڵسوراوە دیارەکان و جێپەنجەى خۆى و هاوڕێکانى لەبەرەوپێشبردنى بزوتنەوەى گۆڕان و خەباتى مەدەنى بۆ چاکسازى و چەسپاندنى دادى کۆمەڵایەتى و سەروەرکردنى یاسا و بە دامەزراوەییکردن بەردەوام بووە.
-  بەداخەوە (4ى4ى2025) بەهۆى نەخۆشییەوە لە وڵاتى سوید کۆچى دواییکرد.