سەرۆککۆمارى کاتیی سوریا گرژییەکانى وڵاتەکەى بە پیلان بۆ دروستکردنى ئاژاوە و نەهێشتنى سەقامگیریی سوریا ناودەبات و جەختیش دەکاتەوە کە پاشماوەکانى رژێمى پێشو هیچ بژاردەیەکیان نییە جگە لە خۆبەدەستەوەدان.

هەواڵ:KNNC

ئەحمەد شەرع، سەرۆککۆمارى کاتیی سوریا لە گرتەیەکى ڤیدیۆییدا کە تایبەت بە ئاڵۆزیی کەناراوەکانى سوریا بڵاویکردوەتەوە رایگەیاند؛ لە ئێستادا روبەڕوى کێشەى نوێ بونەتەوە و لە سوریا هیچ کەسێک لە سەرو یاساوە نییە و هەرکەسێکیش دەستى بە خوێنى سورییەکان سور ببێت زو یان درەنگ سزا دەدرێت.

ئاماژەى بۆ ئەوەشکرد کە رێگە نادەن سوریا لەت لەت بکرێت و رێگەش نادەن هیچ وڵاتێکى دەرەوە و دراوسێیان ببنە هۆکار بۆ دروستبونى شەڕى ناوخۆیی لە وڵاتەکەیان.

شەرع لە بەشێکى دیکەى قسەکانیدا وتى: "بەرەو ئەو داهاتوە هەنگاو دەنێین کە شایەنى خەڵکەکەمانە و ئەو مەترسییانەشی روبەڕومان دەبێتەوە پیلانن بۆ دروستکردنى فیتنە و نەهێشتنى سەقامگیریی لە وڵاتەکە".

وتیشى: پێویستە بەهێز بین لە روبەڕوبونەوەى ئەو کەسانەى هەوڵى هەڵگیرسانى شەڕى تائیفی دەدەن و جەخیشى کردەوە کە لە پاشماوەکانى رژێمى پێشو خۆش نابن و هیچ بژاردەیەکیان نییە جگە لە خۆبەدەستەوەدان.