بەمەبەستی گفتوگۆكردن لەسەر نەخشەڕێگاكانی چارەسەری جەنگی غەززە، ترەمپ لەگەڵ سیسی قسەی كردوە و جەختیشی كردوەتەوە كە هێرشەكانیان بۆسەر حوسییەكانی یەمەن بەردەوام دەبێت.

هەواڵ: (KNNC)


ئەمڕۆ سێشەممە، دۆناڵد ترەمپ، سەرۆکی ویلایەتە یەکگرتوەکانی ئەمەریکا لە تۆڕی کۆمەڵایەتی تروت سۆشیال بڵاویكردەوە: لەپەیوەندییەكی تەلەفۆنیدا لەگەڵ عەبدولفەتاح سیسی، سەرۆك كۆماری میسر لەسەر نەخشە رێگاكانی چارەسەری غەززە گفتوگۆیان كردوە و دەشڵیت: پەیوەندییە تەلەفۆنیەكەی لەگەڵ  سیسی، زۆر باش بەڕێوەچوە.

راشیگەیاندوە: یەكێكی دیكە لە ئەوبابەتەی گفتوگۆیان لەسەر كردوە، ئەو پێشكەوتنە سەربازییەیە دژی گروپە چەكدارەكانی یەمەن كە لەچەند رۆژی رابردوا هێرشێكی بەرفرانانیان كردوەتە سەریان و چەندین كەسیان لێكوژراوە.

لە بڵاوكراوەكەیدا دۆناڵد ترەمپ ئاماژەی بۆ ئەوەشكردوە، سوپای وڵاتەكەی بەردەوام دەبێت لەسەر هێرشكردنە سەر حوسییەكانی یەمەن تا ئەوە كاتەی مەترسی لەسەر كەشتیوانی لەدەریای سوردا نامێنێت.