لە مانگی داهاتودا سەرۆكی ئەمەریكا سەردانی سعودیە و چەند وڵاتێکی دیکە دەکات كە ئامانجی سەرەكی سەردانەكەش تاوتوێکردنی وەبەرهێنان کۆتاییهێنان بە ململانێکان و ئاڵۆزییەکانی رۆژهەڵاتی ناوەڕاست دەبێت.

هەواڵ: (KNNC)

کارۆلین لیڤیت، وتەبێژی كۆشكی سپی ئاشكرایكرد، پێدەچێت لە مانگی داهاتودا دۆناڵد ترەمپ سەرۆکی ویلایەتە یەکگرتوەکانی ئەمەریکا سەردانی هەریەك لە سعودیە و ئیماڕات و قەتەر بکات، سەرباری ئەوەی گفتوگۆكانی پلانی سەردانەكە بەردەوامە، بەڵام بەئگەری زۆرەوە سەردانەكەی دەكەوێتە ناوەڕاستی مانگی ئایارەوە.

وتیشی: ئامانجی سەرەكی سەردانەكەی ترەمپ بۆ گفتوگۆ و تاوتوێکردنی وەبەرهێنانی بیانی و پتەوکردنی پەیوەندییەکانە لەگەڵ وڵاتانی کەنداو ئەوەش بەمەبەستی کۆتاییهێنان بە ململانێکان و ئاڵۆزییەکانی رۆژهەڵاتی ناوەڕاست.

لەدوای دەستبەكاربونەوەی لە ویلایەتی دوەمی سەرۆكایەتییەكەی، ئەمەیەكەم سەردانییەتی بۆ دەرەوەی وڵات كە بەپێی پلانەكەی ریازی پایتەختی سعودییە یەكەم شوێنە سەردانی دەكات.