لەچاوپێکەوتنێکماندا لەگەڵ مامۆستا عەبدوڵای حەسەن زادە بەم شێوەیە وەسفی کاک نەوشیروانی کرد و ووتی: نەوشیروان لە مەیدانی پێشمەرگایەتی یەكێك لە سەركردە بە بەرنامەكان و لەهەمان كاتدا فەرماندە بەوەجەكان و پێشمەرگە بەجەرگەكان بو،  من شتێكم لە كەسێك بیست كە مخالفی كاك نەوشیروان بو باسی یەكیەتی كرد، گوتی: یەكیەتی بەس كاك نەوشیروانیان هەیە  كە ئەهلی بەرنامە و پلانبێت، مەبەستم ئەوەیە مخالفەكانیشی دانیاننابوو بەوە. كە پیاوێكە ئەهلی بەرنامەیە لە مەیدانی رۆشنبیری و ڕوناكبیری و نوسیندا، چەندجار بیرم دەكردەوە، كە نەوشیروان مستەفا  لە شەو ڕۆژێكدا  هەر 24 سەعاتە، چۆن بەو هەمو ئیشە زۆرە ڕادەگات، چونكی ئەوەندە بەكاری رێكخستنی و حیزبییەوە سەرقاڵ بو، كاتی بەشی هەمو كەس  دەبو،  كەچی دەیان كتێب و هەرازان مقالە و تەحلیلی نوسی ئەهلی پڕۆژە و بەرنامە بو.  

هەروەها مامۆستا لە بەشێکی تری قسەکانی لەبارەی نەوشیروان مستەفاوە دەڵێت: تەنانەت تا ئێستا نەمتوانیوە ناوێك لە نوسینەكانی بنێم؛ بڵێم مێژوە، ئەدەبە، كۆمەڵایەتییە، هەرچی دەیڵێی هەمویە، چونكە تەماشای شتەكان بكە، لە زمنی یەك بابەتدا، چەندین بابەتی جۆراوجۆر دەهێنێتە گۆڕێ، بۆ كەسێك كە زۆر بە دیقەت نوسینەكانی بخوێنن، كەڵكی لێوەربگرێت، كەوابێ بە هەموو مانایەك ئەم پیاوە یەكێ لە ڕێبەرانی پایەبەرز و بەوەجی میللەتی كورد و بزوتنەوەی كوردبو.

کاتێک دوژمنانی کورد، ناوی نەوشیروان مستەفا دەبیستن بەجۆرێک گرژ دەبن توشی هەناسە بڕکێکی توند و نائومێدی دەبن، چونکە دەزانن نەوشیروان مستەفا بەبێ پلان و بەرنامە هیچ کارێکی نەکردوە، هەتا لەکارەکانیشیدا لایەنی باش و خراپی روون کردۆتەوە، ئەگەری سەرکەوتنی زیاتر نەبوبی لەشکستی نەی کردوە، هەتا جارێک کاک نەوشیروان وتی: (شەڕێک ناکەم نەی بەمەوە) بۆیە هەمیشە بەبەرنامە دوژمنانی کەوتونەتە دژایەتی، هۆکاری دژایەتی کردنی نەوشیروان مستەفاش دەگەڕێتەوە بۆ ئەوەی جیاوز بوو لەهەموو سەرکردەکانی تری کورد، فەلسەفە و تێڕوانینی بۆ دەوڵەتداری نەوشیروان مستەفا بۆ ئەوە بوو، کە تاکی کورد خاوەنی شکۆبێت وەک هەموو گەلانی تر، هەست بە کەمی نەکات لە ئاست گەلانی تر.

ئەو هێرشەی ماوەیەکە راستەوخۆ و ناڕاستەوخۆ دەکرێتە سەر نەوشیروان مستەفا لەلایەن چەند کەناڵ و کەسێکەوە، وەنەبێ لەخۆوەیە بەڵکو بەبەرنامەیە، بۆ ئەوەی نەوشیروان مستەفا لەم قۆناغەدا لەهزری تاکی کورد بسڕنەوە، تاوەکو پرۆژەکەی کە گۆرانکاریە شکستپێبهێنن، وای نیشان بدەن کە نەوشیروان مستەفا کەسێکی بێپلان بووە، ئەم پیلانە بەتەنها لەخودی چەند حیزبێکی سیاسی و چەند کەسایەتیەک و کەناڵێکەوە نیە، بەڵکو ئەوە عەڵقەیەکی گەورەترە لە وڵاتانی ناوچەکەش بەشدارن، چونکە پرۆژەی نەوشیروان مستەفا بەتەنیا زەرەر لەم هێزانە نادات کە لەهەرێمن، بەڵکو پرۆژەی نەوشیروان مستەفا پرۆژەیەکە زیان بەوڵاتانی ناوچەکەش دەدات، تاکی کورد دەکاتە خاوەن کەسایەتی بەهێز، تاکی کورد دەکاتە خاوەنی پێگەی ئابوری و کۆمەڵایەتی بەتوانا، هەرێمی کوردستان لە هەرێمێکی بخۆرەوە دەکات بە هەرێمێکی بەرهەمهێن، بەوەش زیانی ئابوری لە دەوڵەتانی ناوچەکە دەدات.  

ئەوەی گرنگە ئەوەیە فکری نەوشیروان مستەفا  لەلایەن کەسانی شارەزا شیکاری بۆ بکرێت، جارێکیتر پەخشبکرێتەوە بۆ ناو کۆمەڵگای کوردی، تاکی کوردی لێ هۆشیار بکرێتەوە، دواجاریش هەڵسوڕاوانی گۆڕانی لەسەر پەروەردە ببین و لە پاڵ ئەوەشدا بزوتنەوەی گۆڕان لەحکومەت بەردەوام کار لەسەر ئەو پایانە بکات کە نەوشیروان مستەفا لە پێناوی چاکسازیدا لە سێکتەرەکانی دەوڵەتداریدا خستوینەڕو و تێدەکۆشا، کارکردنی گۆڕان لەسەر پەیامەکانی نەوشیروان مستەفا، وادەکات نەوشیروان ئەگەر بە جەستەش لەناوماندا نەمابێ ئەوا فکر و دیدەکانی لەناوماندا بەرونی هەیە، لەلایەکیتر وادەکات کەس زاتی ئەوە نەکات پیلان لە دژی نەوشیروان مستەفا بگێڕێت، هێرشی ناڕەوای بکاتە سەر، لەخەبات و ماندوبونی کەم بکاتەوە، بەڵکو بەزیندویی بهێڵرێتەوە نەوەکانی لەسەر پەروەردە بکرێ.