ئەمەریکا رەزامەندیداوە بە فرۆشتنى کەرەستەى سەربازیی بە ئیسرائیل بەبەهاى زیاتر لە 20 ملیار دۆلار و ئاشکرایدەکات، رادەستکردنى ئەم کەرەستە سەربازییانە تا کۆتاییەکانى ساڵى 2026 رونادات.

ئابورى:KNNC

بەپێی بەیاننامەیەکى وەزارەتى بەرگرى ئەمەریکا (پنتاگۆن) دوێنێ سێشەممە رەزامەندیدراوە بە فرۆشتنى فڕۆکەى جەنگى و کەلوپەلى سەربازیی بەبەهاى 20 ملیار دۆلار بە ئیسرائیل و ئاماژە بۆ ئەوەکراوە کە "رادەستکرنى ئەم هاوکارییانە چەند ساڵى داهاتو دەبێت".

بەیاننامەکە ئەوەى تێدا هاتوە کە ئەنتۆنى بلینکن، وەزیرى دەرەوەى ئەمەریکا رەزامەندیداوە بە فرۆشتنى فڕۆکەى ئێف-15 بەبەهاى 19 ملیار دۆلار و تەقەمەنیی تانک بەبەهاى 774 ملیۆن دۆلار و تەقەمەنیی هاوەن بەبەهاى زیاتر لە 60 ملیۆن دۆلار و ئۆتۆمبێلى سەربازیی بەبەهاى 583 ملیۆن دۆلار.

چاوەڕێ دەکرێت بەرهەمهێنانى فڕۆکەى جەنگى ئێف-15 کە لەلایەن کۆمپانیاى بۆینگ بەرهەمدێت تا ساڵى 2029 کۆتایی نەیەت و کەرەستە سەربازییەکانى دیکەش لە کۆتاییەکانى 2026 رادەستى ئیسرائیل دەکرێت.

لە بەیاننامەکەدا پنتاگۆن جەخت دەکاتەوە کە پابەندن بە ئاسایشى ئیسرائیلەوە و لە بەرژەوەندى نیشتیمانیی ئەمەریکادایە هاوکارییان بکات و تواناکانیان بەهێز بکات و بیانپارێزێت.

لاى خۆیەوە، یواف گالانت، وەزیرى بەرگریی ئیسرائیل لە بڵاوکراوەیەکیدا لە تۆڕى کۆمەڵایەتیی ئێکس سوپاسى بەرپرسانى ئەمەریکاى کرد بۆ هاوکارییە سەربازییەکانیان و پابەندییان بە ئاسایشى ئیسرائیل.

تا ئێستا ئەمەریکا بەبەهاى 6.5 ملیار دۆلار هاوکاریی ئیسرائیلى کردوە، لە 10 مانگى جەنگى نێوان ئیسرائیل و حەمماسیشدا لە کەرتى غەززە نزیکەى 40 هەزار فەڵەستینى کە زۆرینەیان ژن و منداڵن کوژراون و زیاتر لە دوو ملیۆن هاوڵاتى دیکەى کەرتەکەش ئاوارە بون.