لە سلێمانی سێ کەس دەستگیرکران، کە بازرگانیان بە مرۆڤەوە کردوە و کۆچبەریان گواستوەتەوە بۆ ئەوروپا و بەریتانیا.

هەواڵ:KNNC

بەڕێوەبەرایەتی گشتی ئاسایشی سلێمانی بڵاویکردەوە، لە ئۆپەراسیۆنێکدا لە رۆژانی (8 بۆ 12/1/2025) بەهەماهەنگی لەگەڵ بەڕێوەبەرایەتی گشتی ئاسایشی هەولێر و ئاژانسی تاوانی نیشتیمانی بەریتانی لە شاری سلێمانی و دەوروبەری بە بڕیاری دادوەر و دوای پرۆسەیەکی فراوانی کۆکردنەوەی زانیاری و بەدواداچونی ورد، توانراوە تۆڕێکی بازرگانیکردن بە مرۆڤەوە دەستگیربکرێن.

ئاماژەی بەوەشکردوە، تۆڕەکە پێکهاتبون لە سێ کەس کە سەرجەمیان خەڵکی هەرێمی کوردستان بو، بەرێگەی نایاسایی کۆچبەریان گواستوەتەوە بۆ بەریتانیا و وڵاتانی ئەوروپا.

ئاسایشی سلێمانی دەشڵێت: لەئێستادا تەواوی ئەندامانی تۆڕەکە بەتۆمەتی بازرگانی بە مرۆڤ دەستگیرکراون و لێکۆڵینەوە لە دۆسیەکانیان بەردەوامە.

هاوکات، دەزگای نیشتمانیی بەریتانیا بۆ بەرەنگاربونەوەی تاوان بڵاویکردوەتەوە، یەکێک لە دەستگیرکراوەکان پیاوێکی تەمەن 38 ساڵە و بە تۆمەتی کارکردن لەگەڵ تۆڕی قاچاخچێتی بۆ گواستنەوەی کۆچبەران بۆ یۆنان و ئیتاڵیا دەستگیرکراوە.

تۆمەتباری دووەمیش، خاوەنی کۆمپانیای حەواڵەیە و تۆمەتبارە بە ئەنجامدانی مامەڵەی دارایی.

کەسی سێیەمیش کە دەستگیرکراوە، لەئەوروپاوە لەگەڵ ئەو گروپە کاریکردوە بۆکۆکردنەوەی کۆچبەران و گواستنەوەیان لەرێگەی ئەو تۆڕەوە.