سەرۆکی هەڵبژێردراوی ئەمەریکا بەرپرسانی ویلایەتی کالیفۆرنیای بە ناکارامەیی تۆمەتبار کرد سەبارەت بە مامەڵەکردنیان لەگەڵ ئەو ئاگرەی لۆس ئەنجلۆسی گرتوەتەوە.

هەواڵ: KNNC

دۆناڵد ترەمپ لە لاپەڕەى تایبەتى خۆى لە تروس سۆشیاڵ کە خۆی خاوەندارێتی دەکات نوسیویەتی: "ئاگر لە لۆس ئەنجلۆس بەردەوامە لە بڵاوبونەوە و "بەرپرسە ناکارامەکانیش هیچ بیرۆکەیەکیان نییە چۆن ئاگرەکە بکوژێننەوە".

ئاماژەی بەوەشکرد، ئەمە یەکێکە لە خراپترین کارەساتەکان کە توشی وڵاتەکەمان بوە و لەوە کارەساتبارتر ئەوەیە ناتوانن ئاگرەکە بکوژێننەوە، نازانم  "کێشەی ئەوان چییە؟"

خێرایی و چڕی سوتانی ئەو ئاگرەی لۆس ئەنجلۆسی گرتوەتەوە، تواناى بەرگرى شارستانى شارەکەى خستوەتە ژێر پرسیار و گومانەوە و رەخنەی لەسەر ئامادەیی شارەکە بۆ روبەڕوبونەوەی قەیران دروست کردوە.

میدیاکانی وڵاتەکە باسیان لەوەکردوە لە بەشێک لە ناوچەکان ئامێری ئاگرکوژێنەوە کاری نەکردوە و نەبونی ئاوی پێویست بوەتە بەربەست  و نەتوانراوە کۆنتڕۆڵی ئاگرەکە بکرێت.

ترەمپ کە زیاتر لە هەفتەیەکى ماوە بۆ دەستبەکاربونی و جارێکى دیکە گەڕانەوەی بۆ کۆشکی سپی، رەخنەی لە گاوین نیوزۆم، پارێزگاری دیموکراتەکانی کالیفۆرنیا گرتوە و تۆمەتباری کردوە بەوەی کە نەیتوانیوە ئیدارەى دۆخەکە بدات.

لەوەڵامی ترەمپدا پارێزگاری دیموکراتەکانی کالیفۆرنیا دەڵێت: ئەگەر ترەمپ راستدەکات  بابێت بەیەکەوە پیاسەیەک بکەین لەو ناوچانەی وێران بون .

بە گوتەی بەرپرسانی شارەکە، بەهۆی ئاگرەکەوە  تا ئێستا لانیکەم 16 کەس گیانیان لەدەستداوە و 150هەزار کەسیش ئاوارە بون و زیاتر لە 12 هەزار بیناش وێران بون.