وەزارەتی دادی تورکیا داوایەکی بۆ لێسەندنەوەی پارێزبەندی لە 14 پەرلەمانتار لە ناویاندا، هاوسەرۆکی دەمپارتی و سەرۆکی جەهەپە و سەرۆکی ئیی پارتی، پێشکەش بە پەرلەمانی تورکیا کردوە.

هەواڵ:KNNC

فەرمانگەی راگەیاندنی پەرلەمانی تورکیا بڵاویکردوە، وەزارەتی دادی تورکیا 17 دۆسیەی تاوانی لەدژی هەر یەکە لە توڵای هاتیمئۆغلاری، هاوسەرۆکی پارتی یەکسانی و دیموکراسی گەلان ناسراو بە (دەمپارتی) و شەش پەرلەمانتاری ئەو پارتە و ئۆزگور ئۆزەل، سەرۆکی جەهەپە و پێنج پەرلەمانتاری پارتەکەی و موساڤات دەروێش ئۆغڵو، سەرۆکی ئیی پارتی، پێشکەشی سەرۆکایەتیی پەرلەمانی تورکیا کردوە.

لای خۆشیەوە لێژنەی داد و دەستوری پەرلەمانی تورکیا ڕایگەیاند، تا ئێستا 780 دۆسیەی تاوان بۆ لێسەندنەوەی پارێزبەندیی پێشکەش کراوە، کە 534یان لە دژی پەرلەمانتارانی دەمپارتی بون. 

خولی ڕابردو هەزار و 418 دۆسیەی تاوان بۆ وەرگرتنەوەی متمانە و لێسەندنەوەی پارێزبەندی دژی پەرلەمانتاران پێشکەشی سەرۆکایەتیی پەرلەمانی تورکیا کران و لەم ژمارەیەدا 1101 دۆسیە لە دژی پەرلەمانتارانی هەدەپە تۆمارکرابون کە سێ پەرلەمانتاری هەدەپە متمانەیان لێسەندرایەوە.