ئەمڕۆ سێشەممە (14/1/2025) بە سەرپەرشتی رێکخەری گشتی بزوتنەوەی گۆڕان، دوایین کۆبونەوەی لیژنەی ئامادەکاری بەستنی کۆنفڕانس لە مەکۆی سەرەکی بەڕێوەچو.

لە کۆبونەوەکەدا کە ئەندامانی لیژنەی ئامادەکار و ژمارەیەک لە باژێڕوان و رێکخەری ژورەکان ئامادەیبون، دواین هەنگاوەکانی بەستنی کۆنفڕانسی بزوتنەوەی گۆڕان تاوتوێکران و، لیژنەکە بەرچاوڕونی پێویستیان خستەڕو لەبارەی  ئامادەکارییەکان، وەک بەشێک لە داواکارییەکانی کۆمسیۆنی باڵای سەربەخۆی هەڵبژاردنەکانی عێراق و پڕۆسەی خۆڕێکخستنەوە و پێداچونەوەی کاری رێکخراوەیی بزوتنەوەکە.

دانا ئەحمەد مەجید، رێکخەری گشتی بزوتنەوەی گۆڕان وتی: پێویستە کۆنفڕانس بکرێتە وێستەگەیەک بۆ هەستانەوە و نوێبونەوەی بزوتنەوەی گۆڕان و گۆڕانکاری لە بەشێک لە پەیکەری رێکخراوەیی بزوتنەوەکە، بە ئامانجی هێنانە پێشەوەی گەنجان و ژنانی بەتوانا بۆ ناو جڤاتی نیشتیمانی و ئۆرگانەکانی دیکە.

دوپاتیشی کردەوە، کە دەبێت خۆرێکخستنەوەکە بەشێوەیەک بێت، کە ئۆرگانەکانی بزوتنەوەکە نزیک بن لە خەڵک و ببنە وەڵامگۆی داواکاری و خواستەکانی کۆمەڵگەی کوردستان.

هەروەک داواشیکرد پێشنیار و سەرنج و داوکارییەکانی هەڵسوڕاوان و گۆڕانخوازان، یان هەر كەسێك کە بە ئومێدەوە لە بزوتنەوەی گۆڕان دەڕوانێت؛ بە هەند وەربگیرێت ببنە تەوەری باس و گفتوگۆی ناو کۆنفرانس.

فۆتۆ: محەمەد خەلیفە