رێكخەری ژوری رەوەندی كوردی و ژمارەیەك لە هەڵسوڕاوانی بزوتنەوەی گۆڕان، لە كۆبونەوەیەكدا كە لە باڵەخانەی پەرلەمانی ئەوروپا بۆ ئیلهام ئەحمەد، هاوسەرۆکی پەیوەندییەکانی دەرەوە لە باکوری ڕۆژهەڵاتی سوریا و حەسەن محمد عەلی بەرپرسی فەرمانگەی پەیوەندییە نێودەوڵەتییەکان لە ئەنجومەنی سوریای دیموکرات رێكخرابو، پشتیوانی بزوتنەوەی گۆڕانیان بۆ رۆژئاوای كوردستان دوپات كردەوە.

هەواڵ:KNNC

ئیلهام ئەحمەد، هاوسەرۆکی پەیوەندییەکانی دەرەوە لە باکور و رۆژهەڵاتی سوریا، دۆخی ئێستای سیاسی و ئەمنی سوریای رونكردەوە لە دوای ڕووخانی رژێمی بەشار ئەسەد، تیشکی خستە سەر ناوچەی باکووری ڕۆژهەڵاتی وڵات.

حەسەن محەمەد عەلی بەرپرسی فەرمانگەی پەیوەندییە نێودەوڵەتییەکان لە ئەنجومەنی سوریای دیموکرات، باسی لە حوکمڕانی و داڕشتنی سیاسەت لە باکوری ڕۆژهەڵاتی سوریا و پەیوەندی لەگەڵ وڵاتانی دراوسێ و ئەکتەرە نێودەوڵەتییەکان كرد.

نوێنەرانی بزوتنەوەی گۆڕان، لە كۆبونەوەكەدا جەختیان لە بڕوای نەگۆڕی بزوتنەوەکە کردەوە، پەیوەست بە دۆزی كورد و پرسە نەتەوەیی و نیشتمانییەكان، هەروەك جەختیان كردەوە، كە بزوتنەوەی گۆڕان یەكەم هێزی سیاسی باشوری كوردستان بوە دوای پێشهات و گۆڕانكارییەكان لە بە فەرمی پشتیوانی دەربڕیوە.

لای خۆیەوە ئیلهام ئەحمەد داوای لە ڕەوەندی کوردی کرد کە بەیەکگرتووی پشتیوانی دۆزی گەلی کورد بکەن و ئاماژەی بەوەكرد دەتوانن لەدەرەوە پاڵپشتێکی بەهێزی کوردستان بن.