لە ئەنجامی ئۆپراسیۆنە سەبازییەكانی توركیا و ئێران بۆسەر خاكی هەرێمی كوردستان لە (33) ساڵی رابردودا (845) هاوڵاتی بون بەقوربانی.


هەواڵ: (KNNC)



لەكۆنگرەیەكی رۆژنامەوانیدا رێكخراوی تیمی كوردستانی عێراق (CPT)ـی ئەمەریكی رایگەیاند: لەئەنجامی ئۆپراسیۆنە سەربازییەكانی توركیا و ئێران بۆسەر خاكی هەرێمی كوردستان، سەرباری چەندین چیرۆكی تراژیدیا و ماڵوێرانی (845) هاوڵاتی مەدەنی بون بەقوربانی، تیمەكە داتای نێوان ساڵەكانی (1991 بۆ تەمموزی 2024) بەهاوكاری ژمارەیەك خۆبەخش و خانەوادەی قوربانیان كۆكردوەتەوە.


ئەوەیانخستەڕو، ئۆپراسیۆنە سەربازییەكانی توركیا و ئێران لە ماوەی (33) ساڵی رابردودا (845) بەقوربانی هاوڵاتی مەدەنی لێكەوتوەتەوە كە (194) لە قوربانییەكان منداڵن.


رێكخراوەكە رونیكردوەتەوە، لە (83%)ـی قوربانیان لەلایەن توركیاوە شەهید و بریندار كراون، كە تا ئێستا لە (93%)ـی بریندارەكان و (48%)ـی شەهیدەكان قەرەبو نەكراونەتەوە، لەگەڵ وێرانبون و چۆڵكردنی زیاتر لە (170) گوندی هەرێمی كوردستان.



رێكخراوی تیمی كوردستانی عێراق (CPT)ـی ئەمەریكی ئاماژی بۆ ئەوەكرد، لە ئۆپراسیۆنەكانی توركیادا (702) هاوڵاتی مەدەنی بون بە قوربانی كە (344) هاوڵاتی شەهید و (358) كەسی دیكەی بریندار بون، هەوەها قوربانییەكانی ئۆپراسیۆنەكانی كۆماری ئیسلامی ئێران لە (33) ساڵی رابردودا گەیشتوە بە (143) كەس، لەو ژمارەیەش  (81) شەهید و (62) هاوڵاتی دیكەی مەدەنی بریندار بون.



لەسەر قوربانیانی ژنان و منداڵان راشیگەیاند: لە ئەنجامی هێرش و پەلامارەكانی ئەو دو وڵاتە بۆسەر خاكی هەرێمی كوردستانی عێراق (204) ژن بون بەقوربانی لەگەڵ (194) منداڵ كە تەمەنیان لەخوار تەمەنی یاساییەوە بون.