سەرچاوەیەک لە ئەنجومەنی وەزیرانی هەرێم بە کەی ئێن ئێنی ڕاگەیاند: بۆ لیستی موچەی مانگی هەشت، تێبینیەکانی وەزارەتی دارایی عێراق، جێبەجێ کراون، سەرۆکی دیوانیش دەڵێت: هەفتەی داهاتو شاندێکیان لیستەکە دەبەن بۆ بەغداد و لەگەڵیدا داوای موچەی مانگی ئەم مانگەش دەکەن.

هەواڵ:KNNC

سەرچاوەیەک لە ئەنجومەنی وەزیرانی هەرێم، بە کەی ئێن ئێنی وت: ئەو تێبینییانەی وەزارەتی دارایی عێراق سەبارەت بە لیستی موچەخۆرانی هەرێم هەیبوە کە بریتیبون لە ناوی دوبارە و فەرمانبەرانی بێ بایۆمەتری و ناوچە جێناکۆکەکان، چاک کراون و لیستەکە بە ڕەچاوکردنی ئەو تێبینیانە ئامادە کراوە..

وتیشی، لەم هەفتەیەدا لیستەکە ڕادەستى بەغدا دەکرێت و چاوەڕوانیش بەغداد پارەیان بۆ بنێرێت.

بەڵام، ئومێد سەباح سەرۆکی دیوانی ئەنجومەنی وەزیرانی هەرێم لە لێدوانێکی ڕۆژنامەوانیدا ڕایگەیاند: هەفتەی داهاتو لیستی موچەی مانگی هەشت دەبەن بۆ بەغداد و چاوەڕێ دەکەن دوای دو ڕۆژ لە ڕادەستکردنی لیستەکە، بەغداد پارەی تەواو بۆ موچەی مانگی هەشت بنێرێت.

وتیشی لە سەردانەکەیاندا داوای موچەی مانگی نۆ دەکەن و ئەگەری هەیە بەغداد دوای دو هەفتە، بە هەمان لیست موچەی مانگی نۆیش ڕەوانە بکات..